Ambos ta namora. Cu nan segundo cas, nan escape na paraiso, nan shelo riba tera. Si, ta trata di Aruba. Pa Lois Landau Leeds y Gae Bailey, tabata un dia emocionante diabierna mientras nan a yega Aruba cu e prome vuelo for di Newark y Boston despues di lockdown di Coronavirus. Bon bini!
Lois tabata riba e prome vuelo for di Merca, esaki tabata esun cu a yega pa 1.25pm cu United Airlines, biniendo di Newark, New Jersey. “Mi tin un cas na Aruba pa 13 aña. Mi experiencia cu preparacion di e trip tabata un tiki loco, mi a haci test di Covid-19 na New Jersey cu speransa cu Aruba lo acepta e test, pero djis pa ta sigur, tambe mi a cumpra e test di $75. Honestamente mi djis tabata kier a haya e carchi ED aki cla y haya mi ‘green check’.” E ta asina emociona y feliz cu tur cos ta habri atrobe. “Absolutamente mi ta stima Aruba, mi a biaha pa Aruba pa 40 aña caba.” Lois lo ta compaña pa su yiu muher y pareha y su nieta.
Gae Bailey a bula for di Boston Logan International Airport cu Jetblue ya laga nos sa cu e Transportation Security Administration (TSA) tabata hopi druk, pero fuera di esey e aeropuerto na Boston tabata bashi cu restaurantnan cera. Na momento di aborda, e mester a mustra su carchi ED mientras e steward a entrega carchi ED di papel durante e vuelo, loke a causa un tiki confusion. Pasaheronan tabata cuestionando tocante esaki, y e steward a bisa cu e no tabata sa pakico tampoco, pero no tabata un problema grandi, segun Gae. Na su yegada na Aruba, mester para den un linea, loke a dura hopi largo. E tabata sperando dos linea, un pa test y otro pa hende cu ya a haci e test na cas. Tabatin distanciamento social den e linea aki, pero pa ora a yega e faha di ekipahe, hende tabata para cerca di otro.
Pafo di edificio di aeropuerto, bailarinnan di carnaval y un banda di steelpan a duna e turistanan un bon bini na e One Happy Island. “Mi ta exhausto, pero emociona”, Gae a declara.
Cla pa bay na su cas di vakantie, relaha, y laga e vibe di Caribe tuma over!
