DELRAY – Segun nos colaborador na NoticiaCla tabata e falta di ekipo den e boto, cu ta cual a pone cu no por a notifica pa ayudo mas prome. Asina e ex naufrago mericano John Grady ta conta e corant Sun Sentinel, un siman despues di su odisea den laman rond di Aruba. Awe ta un siman pasa cu e turista mericano hunto cu su instructor di kite surfing a perde riba laman, y 24 ora despues a keda rescata. E la conta e detayes di su storia na e corant mericano. Asina nos a haya sa e detayes di e odisea cu tabatin un final feliz, pero cu pa 32 ora, a tene nos isla den un suspenso.
EXPERIENCIA UNICO
Grady a conta cu su experiencia tabata uno unico pe. Perdi riba laman, sin cu e por a mira tera firme, tabata un pensamento hopi teribel pa e mericano di 38 aña. E odisea a cuminsa ora cu su instructor a bin buske riba un boto di 10 pia, solamente pa tende y mira con e motor di e boto a cay den laman y perde. “E expresion di e instructor a bisa tur cos” Grady ta sigui conta. Nan tabata den problema serio. Su instructor a busca pa un radio, un telefon celular of un ‘flare gun’. Pero nada, segun Grady su version. Y lo mas pio segun Grady, ta cu debi cu e unico persona operador di e compania di kitesurfing, tabata su instructor. Pues no tabatin mas personal cu lo por a nota nan desaparicion tempran. Solamente su prometida “Wishka” tabata sa y no tabata sa con largo lo a dura prome cu e la haya sa.
WISHKA TA SINTI FALTA
Mientrastanto na tera, Wishka tabata purba realisa pakico su partner Grady no a bolbe na e ora stipula. E les a dura mas largo, e dos personanan a bay dal un cerbes of come algo. Tur, motibonan ‘legitimo’ pa e tardansa. Pero ora cu e la bay e sitio di e compania y mira e pechi di su partner den e auto di e instructor , e tabata sa cu algo ta robes. Nunca su partner no ta bay sin su pechi. Pues esey kier men cu su partner no a subi tera bek ainda. Sino e lo tabatin su pechi bisti.
BUSKEDA TA CUMINSA
Despues di notifica polis, y oranan di interogacion, a conduci pa polis realisa cu enberdad Grady no tabata riba tera sino perdi riba laman. Y asina e buskeda a cuminsa.
RESCATE DI TANKERO Pa loke ta Grady, diasabra atardi nan a mira un tankero bin den nan direccion. Y cu un luz cu e tabatin, a lusa e tankero y mira cu e tankero a bira. Esey tabata e señal pa Grady, cu nan a wordo rescata. “E tabata e momento mas contento di mi bida” Grady a bisa. Su pareha Wishka sinembargo ainda no tabata sa nada y tabata sigui den interogacion y buskeda pa su partner. Cu ayudo di ruman muhe di Wishka cu a bula bin Aruba pa yude, nan a sigui pero sin resultado. Te ora cu durante un interogacion, un polis a drenta y informa cu solamente algun palabra ‘nos tin bon noticia. Nos a localisa John”. Asina e odisea a termina. Nan ta conta di e rescate y con un fregata hulandes a trece nan tera e siguiente mainta. Bek na nan ciudad na Delray, Florida, nan ta contento di por conta e storia. Mes momento, nan ta alerta tur hende, cu ora cu bo subi laman, percura pa tin un radio y of un celular cu ta funciona, a bordo. Cu un radio, e odisea por a termina diferente, Grady ta finalisa bisando.
