29 di juni 2016: E siman cu a pasa, mirando e cantidad di eventonan rond di nos isla, Polis a percura pa extra presencia, extra patruya y extra control na areanan druk. Den fin di siman a dedica atencion na Aruba Summer Festival, specialmente pa figuranan sospechoso canando banda di e autonan. A core cu tur for di eybanda.
E areanan conoci cerca di Manuelito’s Bar, Cirkle K y. Hotel Bacarat a haya bishita y unda a topa formacion di grupo a actua mesora. Clubnan manera Lekker y Olde Molen a ricibi bishita di control pa sigura cu ta cera na e ora stipula den nan permiso.
Na Olde Molen a bay den accion pa un pelea alrededor di 3:00am, unda hobennan for di Sabana Basora tabata bringa den parkeerplaats. Ora Polis a yega nan a sali na careda bay, asina duro, cu hasta nan slof nan a core bay laga atras.
Na Gusto Night Club a tuma un sospechoso over di inicial M.J.A.A. cu kier a drenta e club cu un pistol di “airsoft”. El a menasa un otro hende cu e arma, cu mesora ta haci’e sospechoso di portacion di un arma, aunke e no ta di candela.
Den Witstraat a detene un ilegal procedente di Venezuela, cu a drenta Aruba como turista na Juli 2015 como turista pero nunca mas a regresa. Un otro a drenta Aruba na Februari 2016, a haya 4 dia y nunca mas a regresa.
Den fin di siman a para un pickup blanco, cu number A-46234 cerca di Misa di Playa. Pero, ora a par’e a nota cu a benta un sakito transparente cu un puiro blanco for di bentana. Ora a para e auto y controla contenido di e sakito, a tuma nota cu e tin un parecido na cocaina, pa cual a detene e chauffeur y e dos pasaheronan, cu a resulta di ta dos ilegal for di Venezuela.
Diadomingo anochi tambe Polis a para un auto cu number A-57921 den Avenida Alo Tromp pa un control rutinario. Den e auto a topa cu dos pasahero, ambos ilegal. Nan a bisa cu a drenta como turista Venezolano pero a opta pa keda Aruba despues di e fecha pa nan regresa. A entrega nan den man di IASA pa coordina nan deportacion.
Na final mester menciona cu durante e fin di siman di control Polisnan a topa cu varios caso unda a topa sospechosonan cu poco Marihuana, sakito di cocaina, sker, etc. Tur a keda den beslag.
