E cantidad di turistanan na luna di mei a keda casi igual cu na mei 2016. Pero e prome 5 luna di 2017 ta mustra un bahada total di 9,9% compara aña anterior. Turismo crucero si ta bay bon, cu un aumento di 12,8% den e 5 lunanan. Di januari te cu mei a drenta 441.455 turista. Motibo principal pa e bahada ta keda e situacion ta Venezuela. Si ta exclui e bishitantenan for di e pais aki, por mira un aumento di 8,1% for di e otro mercadonan turistico (410.466 bishitante) Esaki nos oficina di turismo ATA ta informa.
Na mei a drenta 80.975 turista
Compara cu mei aña pasa, pa 2017 e turismo procedente for di e continente Norte Americano a aumenta cu 9,5% y ta representa 65,4% di nos turismo den su totalidad. E mercado Mericano a aumenta cu 9,7% y e mercado Canades cu 6,2%. Pa e prome 5 lunanan di 2017, e continente aki a subi cu 9,3% si compara cu e mesun temporada durante 2016. E mercado di continente Latino America a baha cu 26,2% durante e luna di mei 2017 ora compara esaki cu e mesun temporada na 2016. Turismo procedente di Venezuela a baha cu 55,7% compara cu mei aña pasa mientrastanto cu turismo di Colombia a subi cu 4,1%. E mercado di Latino America ta representa 21,5% di Aruba su turismo den su totalidad y si compara e prome 5 lunanan di 2017 cu esun di 2016, esaki a baha cu 50,5%. Pa loke ta e mercado Europeano por nota un aumento di 1,6% compara cu e mesun luna aña pasa. Hulanda a aumenta cu 5,6%, y Reinonan Uni a baha cu 6,3%. E continente Europeo ta cubri 9% di turismo pa Aruba. Pa e prome 5 lunanan, Europa a trece 8.6% turista mas pa Aruba compara cu e mesun temporada na 2016, segun ATA.
Aumento turismo crucero
Durante mei 51.756 pasaheronan crucero a bishita nos destinacion riba un total di 19 barconan crucero. Compara cu luna di mei aña pasa, turismo crucero a crece cu 152,9 % (mei 2016 Aruba a haya 20.462 bishitante for di 8 crucero). En total pa e prome 5 lunanan di 2017, Aruba a ricibi 170 barco crucero cual ta 2 barco menos cu e mesun temporada na 2016. No obstante e caida den e cantidad di barco, Aruba a bira un crecemento di 12,8% den pasahero crucero cu a bishita nos isla durante e prome 5 lunanan di 2017 (395.900 pasahero) compara cu e mesun temporada na 2016 (350,885).
Turismo en general pa Aruba
Merca su prestacion ta fuerte, claro hunto cu diferente otro mercado tambe y e combinacion di esaki ta refleha tambe den resultadonan comparti door di AHATA, segun e oficina di turismo. “E bahada for di Venezuela ta impacta e volumen di e bishitantenan ‘stay-over’ pero esey sigur no ta impactando e calidad, cu ta ser midi entre otro door di entrada pa socionan den turismo y pa pais Aruba. Si compara volumen di Aruba pa cu otro destinacionnan den region di Caribe, por ripara cu nos destinacion ta wordo afecta fuertemente pa cu e situacion di Venezuela, aki mester tene na cuenta cu Aruba ta e mercado primario pa Venezuela tambe, den area di Caribe. E impacto di Venezuela ta wordo sinti na Aruba relativamente mas riba area di volumen, pero no riba aspectonan cu ta mara na ingreso pa medio di turismo. E prestacion fuerte di Merca y otro mercadonan ta refleha un entrada pa camber (RevPar) sumamente fuerte y grado di ocupacion na hotelnan sumamente fuerte.” Esey no kiermen cu Venezuela no ta importante, segun ATA. “E pais aki ta keda un mercado cardinal, pero ora ta papia di e producto hotelero, e dependencia di Venezuela ta menos. Mester tuma nota cu awendia hopi Venezolano ta keda tambe of ta propietario di un condominio. Gran factor pakico e volumen aki a cay ta debi na e bishitantenan Venezolano cu no ta e turista tradicional. Contrario, e meta di nan bishita tawata precisamente pa nan hiba hopi dollar Mericano bek pa nan pais.”
Hotelnan
Segun Aruba Hotel and Tourism Association (AHATA) pa e luna di mei, e ‘Average Daily Rate’ (ADR) a aumenta cu 3,9% compara cu 2016. Esaki den cifra ta US$ 188,54 na 2016 compara cu US$ 195,95 pa 2017. E entrada pa camber disponibel, e asina yama RevPAR a aumenta cu 14,5% di US$ 142,98 na 2016 pa US$ 163,68 na 2017. E anochinan ocupa pa camber a aumenta cu 12%
