Aruba Tourism Authority (ATA) a publica su cifranan nobo di turismo unda por mira cu nos isla ainda ta haya sla for di e situacion na Venezuela.
Den e lunanan di januari te cu november nos turismo a baha cu 9.2%.

 

Esaki ta informacion for di un relato di ATA:

Aña pasa turismo di mercado Mericano tabatin un crecemento mas fuerte cu e resto di region Caribense. E aña aki, Mercado Noord Americano a subi cu 0.4%.  Mientras cu esun Mericano a subi cu 0.9%, esun di Canada a baha cu 6.2%.

Pa loke ta trata mercado Latino Americano, tabatin un reduccion di 28.6% na turismo ‘stay-over’, di cual ta inclui un reduccion di 37.6% di mercado Venezolano y 36.9% di Brazil. Pa mercado Colombiano tabatin un aumento di 41.5% y pa Argentina tabatin un crecemento di 22%. E mercado Latino Americano ta representa 27.6% di nos turismo.

 

Turismo crucero

Pa e periodo aki, turismo crucero tabatin un aumento di 7.8%, compara cu e mesun periodo na 2015. A ricibi 260 barco crucero e periodo aki, cual ta representa un crecemento di 4.8%. Loke ta remarcabel ta e echo cu a ricibi varios ‘first call’ na november. E barconan Carnival Magic, TUI Discovery, Carnival Vista y Meinschiff a haci nan prome bishita pa Aruba e luna ey.

 

Turismo en general: Mercado Mericano stabiel y prometedor

Fuera di e retonan anteriormente menciona y un reduccion di 4% di capacidad aereo pa Aruba for di Merca den 2016, Aruba a nota un crecemento di 1% compara cu e prome diesun lunanan di 2015 pa cu turismo Mericano. E virus Zika cu a wordo registra den region di Caribe, incluyendo Aruba tambe, aunke ta dificil pa midi e impacto di cuanto turista a opta pa no bishita Caribe, ta algo cu tambe mester remarca ora ta papia di 2016. Segun hoteleronan, e impacto no lo tabata mucho, pero si tabatin cancelacionnan di ‘group business’.

Cu campañanan nobo digital y tradicional dirigi na mercadonan principal Mericano, por nota cu e mercadonan a permanece stabiel y hasta a mustra desaroyonan faborabel. Nos mercado principal, cu ta e estado di New York a crece cu un 3.9% durante e prome diesun lunanan di aña. Esaki tambe ta conta pa Massachusets (+2.2%), New Jersey (+4.3%), Pennsylvania (+1.5%), Florida (+1.2%) y Connecticut (+1.9%). Ademas por nota crecemento di bishitante di estadonan cu ta desaroyando positivamente manera Maryland (+0.5%) y North Carolina (+9.3%) durante e prome diesun lunanan di 2016.

 

Aruba a inverti fondonan adicional e aña aki den e mercado Mericano y ta anticipa un 2017 cu mas bishitante di nos mercado principal. Esaki ta meta cardinal pa asina por logra crecemento di nos turismo total pa 2017, un aña unda A.T.A. ta proyecta cu ainda lo mira bahada den cierto lunanan for di e mercado di Venezuela. Pero un aña unda ATA kier mira esaki completamente contraresta pa medio di crecemento di otro mercadonan. Claro cu e mercado cu mas volume pa nos, esta Merca mester hunga un papel clave den esaki. Como meta A.T.A. a stipula un crecemento di 5% for di Merca pa otro aña. Airlift fuerte ta forma parti di e base pa por logra esaki. Asina por indica cu airlift for di Merca ta mustra crecemento di 9.5% durante prome kwartaal di aña 2017.

Acomodacion

Pa e luna di november 41.7% di bishitante a keda na un ‘high rise’ hotel, cu ta un reduccion di 4.4% compara cu november 2016. Pa locual ta hotelnan‘low rise’esaki a representa un10.0% di marketshare, cu ta un aumento di 20.2% compara cu november 2015. Tipo di acomodacion timeshare a ricibi 28.5% di nos bishitantenan, cu ta un reduccion di 5.1%. Mientrastanto 19.8% di e total di bishitantenan a hospeda den un acomodacion alternativo (‘other accommodations’), cu ta un reduccion di 66.1%compara cu november 2015. Esaki ta consistente cu e ausencia di e fenomeno di ‘raspa cupos’ y tambe e normalisacion di e mercado Venezolano.