Archel Winklaar ta bayendo pa dos aña trahando como tour guide y bus driver cu Chogogo Tours Aruba. Den un entrevista special pa Dia Mundial di Turismo e ta conta un poco mas.
Chogogo Tours Aruba ta ofrece un variedad di servicio tanto na turista como local. Nan ta ofrece island tours, beach hopping, bus pa fiesta anochi, transport cu bus grandi y hasta rolstoel pa lama pa hendenan cu tin algun discapacidad por drenta awa.
Loke e mas gusta di su trabao ta cu bo ta conoce hende nobo tur dia. El a expresa cu “no ta tur dia bo tin e mesun cos di haci. Semper bo tin combersacion cu e turistanan, cada dia ta algo diferente.” Segun su persona, luganan manera Rock Formation of Baby Beach ta haci Aruba sobresali como un destinacion popular, “tur e cosnan ey y e reaccion cu e turistanan ta duna ta pone cu Aruba ta sobresali y semper nan ta keda bin back. Por ta nan ta haci e mesun tour atrobe djis pasobra nan ta gusta wak kico Aruba tin pa ofrece.”
Pa Archel, turismo tin un bunita significado y el a comparti esaki cu nos; “Turismo pa mi ta promove bo isla, laga e hendenan wak kico bo isla ta ofrece y conta e hendenan di bo isla.”
