Prome cu Conferencia Anual di Turismo Aruba a keda inaugura ayera nochi, Oficina di Turismo di Aruba (ATA) a tene un desayuno di trabou cu su representantenan di Latino America y nan socionan strategico di turismo local na Surf Side Marina.
Directora di ATA, Ronella Tjin Asjoe-Croes a declara na Bon Dia Aruba cu e meta di e desayuno di trabou aki tabata pa duna cada un di nan socionan local un up date; caminda preguntanan nan ta formula na e directornan di ATA den e region Latino Americano. Di e forma aki nan por ta prepara como ekipo completo prome cu nan tin nan reunionnan den seno di CATA 2017.
Reduccion di turismo
Durante e prome kwartaal di 2017, Latino America a conoce un reduccion di 57.6% debi primordialmente na e problemanan cu ta afecta e pais bisiña di Venezuela. Den e prome kwartaal di e aña aki, Venezuela a baha cu 76.4% compara cu aña pasa locual tin su impacto riba e reduccion total di bishitante, particularmente di e region Latino Americano.
Directora di ATA a bisa cu e diferencia di cifranan den e mercado aki ainda ta keda hopi mas adelanta cu otro mercadonan den Latino America; y tambe den e region di Europa cu tambe Aruba ta uza pa su diversificacion. Aunke nos turismo a cay cu un 15% durante e prome kwartaal di 2017 compara cu aña 2016, ATA a yega di bisa cu ya caba den nan proyeccion nan a inclui un bahada for di Venezuela e aña aki. E parti di nan strategia ta esun di trata di compensa esaki. Pero talbes e no ta wordo compensa completo, ya cu parti di e fluho di bishitantenan for di Venezuela “no ta turismo real”, sino cu nan ta bin Aruba pa otro motibo.
Strategia riba Merca
Mercado Mericano a representa aña pasa alrededor di 56% di e total di nos turismo. “E strategia primordial aworaki ta bo tin cu wak Merca bek”, e directora ta bisa. Den e prome kwartaal di 2017, turismo procedente for di Merca a crece cu un 7.7% compara cu 2016. E ta haya cu ainda tin espacio pa e mercado Mericano por crece mas unda nos ta haya volumen di turismo y caminda nos pais ta haya su ganashi mas rapido.
ATA tin un meta minimo di crecemento di Merca cu un 5% aña aki, “pero nos ta pushando mas duro”, sra. Tjin Asjoe-Croes ta splica. E ta dunando su fruta mirando e resultado den e prome kwartaal di 2017. Esaki ta nifica cu e sector hotelero ta hayando un grado di ocupacion positivo den crecemento den e prome kwartaal di 2017. Tambe tin ganashi pa camber positivo compara cu e mesun temporada aki di 2016, segun directora di ATA. “Mas fuerte Merca ta bo ta mira sigur e traduccion di esaki den sector hotelero tambe.”
11 pais Latino America presente
Ayera nochi e presentacionnan oficial di e 28 edicion di CATA a tuma luga den Renaissance Convention Center, cu e biaha aki ta trece su retonan pa tur e 116 participantenan for di 11 pais Latino Americano, mirando e comportacion di e mercado aki pa nos industria di turismo.
Menos turista for di Brasil
Algun destino a crece un poco manera ta e caso di Colombia for di cu a elimina visa, tambe Argentina y Chile. Mientras cu otro mercado importante manera Venezuela a cay substancialmente. Tambe Brasil a cay cu un 22.7% durante e prome kwartaal di 2017 compara cu 2016. Tin varios factor cu a hunga un rol na Brasil, di un banda e devaluacion di nan moneda nacional compara cu dollar cu ta haci cu e pakete turistico mas caro actualmente pa nan; y e limitacion di oferta aereo. Tambe e situacion politico cu e pais ta pasando aden relaciona cu e scandal reciente di corupcion na Petrobras y e famoso caso Odebrecht.
ATA ta haya cu Brasil ta keda un mercado strategico cu ta biniendo bek keto bay. Nan ta mira cu pronto Aruba lo retoma di un manera mas intensivo nan plan di bin cu un vuelo non stop for di Brasil. Tambe ATA trahando riba diferente conexion aereo pa e mercado nobo di Mexico, entre nan bin cu vuelo charter durante cierto temporada.
Sra. Tjin Asjoe-Croes ta laga sa cu Latino America ta keda importante; ya cu aña pasa e region aki a representa 27% di e total di bishitantenan cu a bin Aruba. Tambe el a indica cu strategicamente nos mercado Latino Americano ta un region hopi importante, ya cu ATA a bin cu un strategia di parti di nos producto Aruba pa diversifica nos mercadonan. Na 2014 pa ehempel Merca tabata representa un 73% di e base total di bishitante. “E filosofia tras di esaki ta cu bo ta mucho dependiente di un mercado. Y nos ta mira ora cu tin crisis, despues Aruba ta recupera rapidamente mas lihe cu otronan den Caribe ora cu algo ta pasa na Merca.”
ATA como oficina di turismo di Aruba ta trata di balansa su portafolio di nos mercado turistico. E ta haya cu Latino America ta un “fit natural” y Aruba su producto turistico tin hopi oportunidad den e region aki.
Venezuela
Venezuela ta un di e retonan principal pa ATA. Directora Tjin Asjoe-Croes ta indica cu Venezuela actualmente ta pasando den un momento dificil, pero su patronchi historico “semper a presenta momento di volatividad”, cu ta mara na e parti economico y politico di e pais. “Pero no obstante, semper Venezuela a keda e mercado number dos pa Aruba, y esey probablemente y por lo pronto no lo cambia.”
“Como ATA nos ta keda presente den e mercado. Nos ta ahusta nos proyeccionnan y nos ta spera cu e mercado ta normalisa.”
E ta agrega cu historia di nos turismo a mustra cu despues di momentonan di crisis, e ta bin bek. E turistanan Venezolano ta sigui bishita nos isla keto bay, aunke kisas nan no ta bin for di Venezuela mes; ya cu hopi a emigra pa otro paisnan entre nan Merca. ATA den su strategia ta bin cu mensahe dirigi riba e mercado Venezolano na Merca realisando cu Aruba por bira un sitio di encuentro familiar. “Nan ta un bishitante masha atractivo mes! Ora nan bin akinan no tin limite. Esun cu tin e modo, tin e modo berdaderamente pa por pasa un vacacion y ta gusta Aruba.”
