Turismo den Caribe riba 29 miyon bishitante na 2016

Aunke tabatin insiguridad politico, insiguridad pa cu criminalidad y retonan economico e region Caribense a conoce un crecemento di 4,2% den bishita di turistanan na 2016. Cual ta ariba e crecemento mundial di turismo (3,9%).

Esaki e secretario general di Caribbean Tourism Organization a divulga ayera den nan relato anual riba e industria turistico den e region aki. E resultado ta cu tabatin 29 miyon bishitante aña pasa, cual tabata pa prome biaha den historia. E cantidad aki tabata 1 miyon mas tambe compara cu 2015. Tambe por mira cu e cantidad di turistanan crucero a crece cu 1,3% pa algo mas cu 26 miyon na total. Ainda e mercado Mericano (US) ta keda esun mas grandi y a aumenta cu 3,5%. Sin embargo e crecemento aki ta mas abou cu e mercado Europeo. Eynan por mira e crecemento mas fuerte. Segun e organisacion di turismo, e bishitantenan di Inglatera/Europa a aumenta riba 11%, cual ta 5,6 miyon hende. E cantidad di turistanan Ingles cu a bishita e region aki a crece cu 4% aña pasa y for di Alemania e cantidad hasta a crece mas cu 8%.

2016 tambe a mustra cu tin interes bou di e hende di Caribe mes pa pasa vakantie na nan region. Esaki ta di dos aña cu por mira e fenomeno aki aunke e conexion entre islanan Caribense ta dificil y hopi costoso. E organisacion tambe ta menciona Canada, normalmente un mercado fuerte y stabiel pero aña esaki a baha cu 3,5%.

Hotelnan cu resultado negativo
Caribbean Tourism Organization ta bisa cu nan ta consciente cu e crecemento aña, teniendo cuenta tambe cu tabatin e menasa di Zika. Nan a pronostica cu na 2016 lo yega na 30 miyon bishitante, locual no a logra. Pero nan ta indica cu nan ta contento cu e 29,3 miyon y asina casi yega na meta. Un otro cos cu e organisacion ta remarca ta cu e hotelnan a experiencia resultadonan negativo aña pasa compara cu 2015. Esaki mester mas atencion, segun nan, y mester keda monitor kico e bishitantenan cu ta bin, ta haci, cuanto tempo nan ta keda y cuanto nan ta gasta.

Pronostico
E organisacion turistico ta premira den e siguiente lunanan di 2017 cu e cantidad di turistanan lo crece menos lihe: entre 2,5 pa 3,5%. Nan tambe ta pronostica cu e cantidad di turistanan crucero lo aumenta cu 1,5 pa 2,5%. Pues nan ta spera cu crecemento pa e aña pero no asina fuerte.