Mientras cu supuestamente bida politico, tanto den parlamento como den gobierno, ta bay den un sosiego temporal, posiblemente bon mereci, e ultimo dianan ta mustra bastante turbulencia. E parti mas candente a bin di exterior, unda e reunion di IPKO a tuma un vuelta inespera, cu un parlamentario di Aruba den centro di atencion. Nos no mester ripiti tur loke a bisa di diferente banda despues di e incidente unda un parlamentario di Aruba a sinta wak Netflix durante un reunion den Eerste Kamer di Hulanda. Pa casualidad tabatin periodista su tras den un posicion mas halto cu tabatin vista riba su computer cu a mira tur cos y a haci loke prensa ta haci: reporta. Aunke na prome momento el a trata di duna un hustificacion pa loke e tabata haci, finalmente el a tuma e bon decision di renuncia como miembro di su fraccion.
Aunke den su caso ta trata di un incidente minimo, no ta trata ni di un infraccion ni mucho menos un delito, e ta un incidente cu ta pone e mes, su partido y su coleganan den un situacion di ‘embarassment’ cu a fortifica e pensamento di hopi ciudadano cu e tipo di encuentro aki (IPKO) ta mas bien un vakantie financia pa e pagador di impuesto, cu tur tipo di luho. Esaki ta daña e imagen di e parlamentario en general mas ainda, cu di mes caba no ta cos di gaba. E imagen pober di e parlamentario no ta algo cu tin di haci cu e tipo di incidente aki, sino mas bien cu otro aspecto, manera ausencia regular den parlamento, conocemento pober di e materia cu ta trata den parlamento y por lo tanto un contribucion pober tambe na e debate parlamentario. Mester bisa na fabor di e parlamentario particular aki cu semper el a distingui como un di e miembronan bon prepara riba e terenonan unda su experticio ta. Te dia di e incidente aki cu a costa su posicion, e tabata un di e miembronan activo den parlamento y envolvi den tur loke tabatin relacion cu su areanan di interes.
Nos mester puntra nos mes kico ta di siña for di e incidente aki. Por ehemplo, cu el a tuma e paso corecto di entrega su retiro, algo di aprecia pasobra e tabata lo corecto pa haci, pero ta cuanto biaha nos no a mira incidente hopi mas grave ta tuma lugar, y envez cu e partido mes pone presion pa un persona asina tuma su retiro, tur hende ta montona pa defende e persona pa e no baha. E escena bochornoso alrededor di e posicion di e ministro acusa formalmente di corupcion grandi, cu a haya tur apoyo di un gran parti di su partido y cu no a renuncia su puesto, lo keda semper den nos memoria. Ki diferencia nos por a mira na nos hermana isla, unda un ministro ta bin dilanti y ta declara publicamente cu e ta renuncia su puesto, pasobra Ministerio Publico tin un investigacion penal andando contra su persona.
Nos no a yega na e nivel di actuacion corecto ey ainda, pero e parlamentario aki en todo caso a yuda, cu su accion corecto aki, pa set un standard mas halto con nos politiconan mester actua si nan comportamento ta den tela di huicio. Ta importante pa exigi por lo menos e accion aki di otronan, di awor en adelante.
Otro asunto cu lo keda pidi nos atencion, tambe durante e periodo di vakantie aki, ta e asunto di supervision financiero y kico lo mester sucede proximamente. E rueda di prensa ayera di nos prome minister no a satisface, den e sentido cu loke e ta trece dilanti ta simplemente ‘too good to be true’. Acelera e proceso pa yega na un ‘Begrotingskamer’ no ta bay yuda, pasobra no ta trata di supervision den cualkier forma, sino di supervision na nivel di Reino. Den e asunto aki nos ta keda haya e impresion cu gobierno y e fraccionnan cu ta sostene gobierno, ta comporta nan mes manera e mucha recalcitrante cu e maestra a manda bay para den hoeki, pero cu despues di un rato a haya ta basta y ta bisa e juf cu el a dicidi cu e ta bay sinta atrobe… Comentario di e maestra: “Desde ki dia abo ta dicidi aki den ta con largo bo castigo ta?”
Di nada den e rueda di prensa nos ta haya e impresion cu tin algun comprension cu ta hungando un wega aki cu por sali bon caro pa Aruba, y den e caso di paga, ta nos ta paga y no e politiconan. Cu e conducta actual, Aruba den e proximo añanan por wel di lubida e tan gaba bon ambiente cu Hulanda. Mientras nos prome ministro ta sali pafo y ta bisa cu tur cos a bay den bon ambiente, loke por ta berdad, pero e mensahe di banda Hulandes no por tabata mas cla: no ta acepta e maniobranan haci na Aruba pa pone supervision di Reino un banda. Si tur esaki ta bay hiba nos na mas conflicto cu Hulanda, ta importante pa nos keda mira e asunto aki den su proporcion corecto: e ‘maestra’ ta dicidi ki dia supervision ta termina.
