Tur yudansa ta presupuesta tentativamente cu 362 miyon pa 2021

E aña aki gobierno a cualifica como uno di recuperacion economico. Sinembargo despues minister di Finanzas y asunto Economico, Xiomara Maduro a duna un perspectiva economico pa 2021 ayera tardi.

Contestando pregunta di e matutino aki, el a laga sa cu claramente ta bay tin companianan cu na mita di caminda di 2021, no tin mas rosea pa sigui opera.

Pa loke ta presupuesto 2021 loke a wordo presupuesta pa sostene gasto di nos economia – segun minister Maduro – nan tin premira un suma di 362 miyon florin. Di e suma aki 42 miyon ta pa ayudo di FASE. E ayudo destina pa comerciantenan chikito ta 40 miyon y subsidio di salario ta 280 miyon. E cifranan aki por cambia na caminda, prome cu finalmente e ley aki ta yega na Parlamento.

“Pa e trankilidad cu e hendenan mester tin cu pa e aña aki gobierno ta presupuesta full e yudansa akinan,” segun e mandatario. Tur e fondo aki nos ta hay’e fia for di Hulanda, caminda nan tin condicionnan. Pero e mandatario no ta spera cu na mita di caminda Hulanda ta stop cu e fiansa cu nos ta bin hayando na cero interes, y laga economia di nos pais pa su cuenta.

P’esey e yudansa cu pa aworaki gobierno ta dunando pa e companianan chikito, nan tur ta para den e presupuesto 2021. Tambe nan a bin cu cierto alivio fiscal. Por ehempel mas cu 2 mil compania chikito no mester paga BBO, BAZV y BAVP cu ta yuda nan den nan fluho y circulacion di cash. Pero tin e companianan mediado cu ta conta cu e ayudo di subsidio di salario administra dor di SVb.

Tambe nan lo beneficia cu e parti di flexibilisacion laboral, segun minister Maduro. Nan ta trahando caba riba un ayudo mas structural pa esunnan cu a keda of lo keda sin trabao locual lo wordo hinca den un ley cu gobierno ta trahando riba dje. Tur e ayudo aki lo wordo brinda pa comercio den su totalidad, el a laga sa.

Pero tur cos ta depende con nos pais lo sigui bay dilanti. Pero e enfasis di gobierno ta pa nos pais por recupera economicamente, y pa logra esaki nan mester yuda e companianan chikito.

Pero di otro banda nan mester evalua cual ta e posibilidad di gobierno pa por sigui brinda nan. Aworaki gobierno di pais Aruba ta den un situacion cu mester presta fondo for di Hulanda pa sigui brinda e tipo di asistencia aki pa asina nos economia por sigui draai.