E fecha final pa paga e di dos mita di aña a drenta na vigor caba. Vocero di Servicio di Impuesto di Aruba (SIA), Mervelyn Romano ta declara cu na e momento aki tur automobilista mester ta coriendo cu e sticker blauw pa no core e risico di haya un boet for di polis.
Dia 1 di juli SIA a cuminsa cu e di dos mita di aña; y esey ta nifica e pago completo di 2017 riba belasting di vehiculo di motor. Ainda SIA no tin un bista di e cantidad di automobilista cu a cumpli cu e obligacion aki; ya cu sra. Romano no a ricibi e lista aki. Nan pa wak con e comportacion di pago ta. Sinembargo durante e ultimo dianan specialmente diabierna ultimo, nan tabatin e sala hopi yen na Camacuri. Ayera mainta nan a lanta cu basta hende na porta pa bin haci nan pagonan tambe.
Ayera e atencion pa publico of tempo di spera pa yega na bo number tabata entre 30 pa 40 minuut. Tambe hopi di nan clientenan ta bayendo na oficina di gobierno den diferente districto pa paga. “E clientenan ta haciendo nan pago. Pero nos tin cu haya e cifranan pa nos wak con leu e cumplimento ta”, sra. Romano a bisa. Na Camacuri e cantidad di cliente ta mas grandi; ya cu SIA ta bin hayando clientenan cu ta bay pa entrega nan plachi di number; ya cu diabierna tabata e fecha final pa esey tambe. SIA ta keda conseha e clientenan pa tene na bista e fecha final cu ta regarda e pago di impuesto di vehiculo di motor.
