Finalmente e decision a cay cu definitivamente, y a pesar di e cantidad di Covid activo, scol lo habri dia 20 di augustus awor.

 

E decision cu minister di Enseñansa, Ciencia y Desaroyo Sostenibel,  Rudy Lampe a divulga ayera mainta, a wordo tuma den seno di crisis team a base di e reunionnan cu nan a tene cu e veld di enseñansa.

 

Minister Lampe a declara cu e no a participa den e reunion, tampoco den e toma di decision aki. Actualmente den e situacion di e ‘normal nobo’ cu nos ta pasando aden, e tipo di decision aki ta cay den man di e crisis team.

 

Aña escolar

 

Despues di dirigi palabra di condolencia na famia di Juff. Mimi Lampe (d.f.m), e mandatario a informa cu diaranson a anuncia e decision di crisisteam cu diahuebs otro siman tur scol ta habri na Aruba. Esaki pa cumpli cu ley di enseñansa obligatorio.

 

Bon Dia Aruba a canalisa algun di e preocupacionnan cu SIMAR a yega di trece dilanti cerca e matutino aki. Un di nan ta cu e sindicato aki cu ta representa e docentenan, no tabata envolvi den e reunionnan pa dicidi riba apertura di aña escolar nobo.

 

Minister Lampe a reitera cu den e situacion di emergencia cu pais Aruba ta pasando aden, desde cu Covid a bati nos porta, ta crisisteam, bao guia di minister presidente, ta tuma e tipo di decision aki. El a revela na e matutino aki cu e mes no a participa den ningun di e reunionnan cu a tuma lugar pa atende e asunto aki.

 

E mandatario bistiendo un mask blanco a bisa cu nos ta den un situacion cu no ta normal debi na e pandemia aki. Localmente e casonan a aumenta drasticamente y nos tin hende interna den hospital. Pesey crisis team a anuncia diferente regla cu mester cumpli den cuadro di protocol di departamento di Salubridad Publico (DVG). Nan ta pidi pa e scolnan cu ta bay habri nan portanan dia 20 di augustus pa cumpli estrictamente cu e reglanan di DVG.

 

Otro siman scol ta habri, y e siman aki e docentenan y scolnan mester cuminsa prepara pe.  Dicon a tarda hopi pa bin cu decision te aworaki riba apertura di aña escolar nobo? Minister Lampe a contesta e matutino aki cu esey no ta den su man. “Esey ta den man di e crisis team,” el a bisa.

 

Ta nan ta esunnan cu mester evalua e situacion y -segun e mandatario- e situacion no ta normal, y nos no ta bay back na un situacion normal tampoco. “Normalidad no ta un opcion mas pa e mundo aki,” el a agrega.

 

Ademas di diferente reto entre nan, awe conseho di Minister di Reino ta bay dicidi tambe riba e ayudo financiero pa Aruba. Ta  situacion cu ta haci cu nos situacion no ta normal. Tur esaki a pone cu tabatin e factor insigur cu a tarda cu e crisisteam a tuma e decision, si scol ta habri of no dia 20 di augustus.

 

Un preocupacion cu SIMAR su presidente, Josephine Albertus, a yega di trece dilanti tin di haci cu e situacion di docentenan y alumnonan cu ta padece algun malesa di base ya cu nan por core risico cu nan salud. Con lo para cu nan?

 

Minister Lampe a laga sa cu a pesar cu a dicidi di habri tur scol otro siman, reglanan y protocol di  DVG  ta señala cu si e mayor ta dicidi cu nan yiu no ta bay scol pa cualkier motibo di salud, esaki ta posibel tambe. E regla aki ta conta pa e maestronan tambe si nan ta sinti cu nan ta cay den un grupo di riesgo. Nan mester comunica esaki na e cabesante di scol.

 

Esaki ta conta si un team di scol ta bisa cu pa 20 di augustus ainda nan no ta cla cu tur e condicionnan. E mandatario a bisa cu nan ta flexibel tambe pa e scol ey por habri riba otro fecha tambe.  “Pa nos en berdad, salud y siguridad,  ta na prome luga,” el a declara.

 

Enseñansa on line

 

E mandatario a sigui enfatisa riba enseñansa digital, mirando e realidad nobo cu nos ta confronta. El a ilustra e situacion tanto e docentenan dunando les y trahando for di nan cas, como e studiantenan hayando les y studiando desde nan cas. Pa asina tur mucha no keda sin haya educacion, ya esaki ta un derecho cu nan tin.

 

Tur esaki ta opcion pa e mayornan cu ta kere cu esaki ta e miho manera pa nan yiu su educacion. El a bisa cu e diferente opcion cu tin aworaki y nan tur ta posibel. Ademas Burea Leerplicht  ta conoce su instruccion y maneho. Esta cu e muchanan tin derecho na educacion, pero nan por ricibi educacion pafo di scol, y fisicamente den e instituto educativo. Segun e mandatario mas mayor ta optando pa enseñansa on line. “Pesey ta bisa cu Covid a acelera e innovacion den enseñansa,” el a bisa.

 

Encuanto si e opcion di enseñansa digital via on line ta keda habri pa esunnan cu tin internet y cu tin devices. Pero con ta para cu esunnan cu no tin e facilidad aki. SIMAR a yega di trece dilanti cu tin maestronan y alumnonan cu no tin por ehempel devices. Te hasta a wordo priminti pa un compania por duna nan facilidad di pago. E mandatario a declara na e matutino aki cu esaki ta posibel caba. Riba e website di departamento di Enseñansa nan a pone e caracteristicanan di e devices cu nan lo mester di dje, y tambe e diferente establecimento cu ta brinda e posibilidad di pago flexibel.

 

E matutino aki a trece cerca e mandatario, cu SIMAR a yega di menciona un encuesta caminda un 90% di e maestronan no ta cla pa duna les digital. Nos a puntra minister Lampe si den e periodo di vakantie cu un djis ta caba, nan a percura pa prepara e docentenan pa duna les digital. El a laga sa cu nan a respeta cu nan tabata cu vakantie, pero si otro siman nan lo dedica dos dia pa prepara nan.

 

E mandatario a bisa cu nan ta ofrece diferente posibilidad of opcion digital, entre nan lands examen completamente on line cu guia. Nan ta bay introduci aworaki esaki cu tur esnan cu kier hala nan MAVO, HAVO of WVO diploma, pa asina nan ta habri e posibilidad aki full on line. Esnan interesa por scoge pa yama na 5283400 y tambe consulta departamento di Enseñansa su portal digital: www.ea.aw