‘Fake news’, asina parlamentario actual Dangui Oduber (MEP) a tilda tur informacion relaciona cu e reparticion di cartera y nan supuesto ministernan cu a wordo divulga den social media y medionan di comunicacion, durante e delaster dianan di formacion di gobierno. El a laga sa cu te ora cu formado di gobierno no ta divulga esaki oficialmente, noticianan falso nan ta.
Ayera mainta durante e conferencia di prensa di e fraccion di MEP, sr. Oduber a purba di trece mas claridad riba e situacion actual di formacion di gobierno, specificamente riba e proceso di screening cu a crea un expectativa grandi actualmente. Esaki debi cu a surgi rumornan cu tin conseho negativo riba un of mas posibel minister. Pero e noticia aki no ta cuadra cu realidad, segun sr. Oduber. Te unda e sa, tur candidato pa bira minister ta ministeriabel. “Ningun di e noticianan cu ta core rond ta cuadra cu e realidad,” el a bisa.
Sr. Oduber a indica cu nan ta compronde cu e proceso di screening a termina ‘masha dia caba’. E proceso aki a termina fei siman pasa caba te asina leu nan no a wordo informa riba ningun conseho negativo di e candidatonan pa bira minister.
“Ma compronde cu tur candidato cu a wordo presenta como posibel candidatonan pa bira minister ta ministeriabel”, asina el a confirma.
E ta deduci cu si esaki no tabata asina sigur prensa por a haya sa esaki caba. E ta enfatisa cu tur e noticianan y mensahe manda pa medio di e social media y boletin extra ta noticianan falso pa crea mas bruhamento. El a laga sa cu ya caba nan ta den e fase final y den breve Aruba lo conoce su gobierno nobo.
Sinembargo nan a compronde for di formado di gobierno mes cu e proceso di entrega di asientonan di e candidatonan cu ta bira minister mester tuma luga. Sr. Oduber a confirma cu MEP lo bay tin cinco minister y nan mester entrega nan asiento como parlamentario y pone stoel disponibel pa e otro candidatonan di nan partido por asumi nan rol como parlamentario. Esaki lo crea un proceso nobo di huramentacion di e miembronan nobo. Pero esaki mester tuma den concordancia cu gobernador di Aruba kende ta esun cu mester duna luz berde pa e proceso oficial cuminsa. Esaki ta e proceso cu lo sigui tuma luga pa asina e gabinete Wever-Croes por huramenta.
El a bisa cu nan lo tene cuenta cu e proceso di ‘geloofsbrieven’ of credencial pa evita loke a yega di sosode na Corsou. Nan ta percura cu e fraccion mayoritario cu ta sostene gobierno keda mantene e mayoria den parlamento. Esaki na momento cu un miembro di parlamento lo mester bira un minister ta facilita su stoel pa un otro miembro di nan partido drenta den e momento ey.
E anuncio di parlamentario Oduber ta tuma luga un dia despues cu e lider di MEP y formado di gobierno, Evelyn Wever-Croes a laga sa cu e proceso di screening ta canando bon y e siman aki Aruba lo conoce su gobierno nobo.
Igualmente formado di gobierno a informa caba algun dia pasa cu e partijraad di MEP a aproba e reparticion di cartera manera a keda palabra entre e partidonan cu ta forma e proximo gobierno di coalicion (MEP-POR-RED). Sra. Wever-Croes a laga sa cu unabes gobernador ta duna su aprobacion, e por anuncia como formado di gobierno cual e carteranan aki ta y kende ta esunnan cu lo bira minister.
