Mitch Henriquez (SH).jpg
– Polis na Den Haag a tuma medida disciplinario contra cuater di e cinco polis envolvi den e morto di Mitch Henriquez juni aña pasa. Niun di nan ta perde trabou y asina e famia ta haya e castigo ta mucho abou.
Esaki ta un castigo cu polis mes a imponi despues di un investigacion interno. Dos polis ainda mester sali dilanti corte penal como cu ta sospecha di uza mucho violencia, cual a conduci na e morto di Mitch Henriquez.
E medidanan disciplinario ta encera cu dos polis ta haya un retiro condicional. Esaki ta nifica cu nan mag di keda cu nan trabou bou condicion cu den un periodo di prueba di 1 aña lo no comete eror. Tampoco nan mag di subi caya cu arma of otro instrumentonan di violacion. E dos otro polis ta haya un warning por escrito. E di cinco polis ta bay liber pasobra e si a cumpli cu e reglanan, segun e declaracion di e cuerpo di polis Hulandes ayera mainta.
Influencia caso 
Famia a reacciona riba e declaracion aki di biaha den prensa Hulandes. Nan ta haya cu e declaracion a bin mucho trempan y ta acusa polis di asina purba di influencia e caso penal contra e dos polis. E caso aki lo tuma luga na april otro aña. Banda di esaki nan ta haya e castigo disciplinario mucho abou.
Polis ta keda para tras di e detencion di Mitch Henriquez. Sinembargo ta bisa cu e ehecucion tabata ‘sin coordinacion’. Y tres di e cinco polis a uza mucho violencia contra e reglanan. Pero finalmente niun di nan tabatin e intencion di causa e morto di Sr. Henrique sea maltrat’e den e forma ey, asina e polis ta declara.
Na october di e aña aki e fuente Hulandes NRC a divulga cu e hefe mas halto den polis Hulandes, esta Gerard Bouman, ya a garantisa e cinco polis cu niun lo perde nan trabou. Esaki ta algo remarcabel como cu e tempo di su promesa e investigacion disciplinario ainda mester a tuma luga.