Pensionado pagamento belasting br (2).jpg

Tanten cu e pensionado ta ricibi aangiftiging  y e ta registra pa Inkomstenbelasting y e ta ricibi tambe un formulario di declaracion di impuesto, e tin e deber di yen’e y entreg’e.

Mientras cu e persona sea cu e ta haya un pensioen di trabou of esun di behes (AOV) di Banco di Seguro Social (SVb), nan tur ta tiponan di entrada cu ta cay bou di Inkomstenbelasting.

“Nan no ta un entrada cu na e momento aki ta liber di belasting”, asina vocero di Servicio di Impuesto Aruba (SIA)  Sra. Meverlyn Romano a declara na Bon Dia Aruba.

Entradanan

Nan ta un tipo di entrada cu SIA ta considera como belastbaar,  kiermen un entrada cu no ta liber di belasting. Na momento cu un pensionado tin un entrada, ya sea pension di trabou of pension di AOV of otro tipo di entrada, nan ta wordo considera como entradanan cu ta cay bou belasting.

Solamente ora cu un persona tin un pension di behes so -pa ehempel esun di SVb- e no ta paga Inkomstenbelasting. Pasobra e ta cay bou e nivel di no paga belasting, ya cu e tin un entrada inferior di alrededor di 20 mil florin anual.  Esaki ta haci cu e pensionado por haya un aangiftiging  pa declara su pension di behes. E ora ey e por spera despues cu e no ta paga belasting, ora cu e ta haya su cobransa pa motibo cu e ta cay bou e limite di entrada pa paga Inkomstenbelasting.

“Un persona ta cuminsa paga ora cu e ta surpasa e suma di alrededor 20.800 florin. Tanten cu e ta keda bou di esey, e no ta paga Inkomstenbelasting”, asina Sra. Romano a laga sa.

Kitamento registro di Inkomstenbelasting

Unabes cu un persona ta bira pensionado su tipo di entrada cu e ta ricibi ta cambia. Pa ehempel, e no tin salario di trabou mas, pero e ta cuminsa haya pension di behes. E ora ey e ta cay den un nivel di entrada mas abou di loke e ta custumbra cu ne, y esey ta haci cu e no ta paga Inkomstenbelasting. 

Loke SIA ta bin haci ta cu si un persona ta registra pa Inkomstenbelastingp,  y despues den transcurso di aña e ta bira pensionado, ya cu nan ta yega na cierto edad cu ta cuminsa cobra un pensioen,  SIA ta purba di saca e persona aki for di nan registro di Inkomstenbelasting. Esaki ta haci cu pa e añanan siguiente  nan no ta bay haya un formulario di declaracion di belasting pa yena.

Maneho

Sra. Romano a bisa cu un par di aña caba nan ta implementa e maneho aki, solamente cu e no ta sosode automaticamente. Mayoria di bes e pensionadonan mes ta acudi cerca SIA durante nan campaña di yenamento di informacion di declaracion di belasting.  E ta asina cu unabes cu un persona ta wordo registra pa Inkomstenbelasting, no ta gewoon cu SIA ta bay kit’e for di nan sistema di registro.  Ya cu e persona aki ta keda haya un formulario di declaracion tur aña; y e tin e deber pa entreg’e tambe.

Sinembargo ora cu ta keda demostra pa medio di e aangiftiging cu e persona tin e pension di behes so, e funcionarionan di SIA mes ta manda un peticion pa kita e pensionado aki for di e registro di e Inkomstenbelasting of e pensionado ta wordo guia pa realisa e proceso aki. Consecuentemente pa e añanan siguiente e pensionado aki no ta bay haya mas un declaracion pa yena. 

Pero prome SIA ta evalua e pensionado su entrada, y si e ta keda constata cu di berdad solamente e pensioen di behes e persona ey tin, e ta wordo kita for di nan sistema di registro di Inkomstenbelasting, ya cu e tin su motibo tambe.

Sra. Romano a splica cu pa departamento di Impuesto manteniendo e tipo di pensionado aki den nan registro ta costa nan placa. Pasobra pa nan por saca un formulario di declaracion pa e pensionado caba, sin cu despues e tin cu paga belasting. E ta un trabou cu kisas no tabata necesario. 
 

Sra. Romano a clarifica debidamente cu e posibilidad aki di blokia nan for di nan sistema di registro di Inkomstenbelasting ta existi so ora cu e pensionado tin solamente un pension, y nan ta ricibiendo un aangiftiging di Inkomstenbelasting, ya cu esaki ta completamente di acuerdo cu ley.

Ademas e kitamento di pensionado for di nan registro di Inkomstenbelasting no ta conta pa tur pensionado tampoco. Pasobra tin pensionado cu nan tin nan pensioen di behes, pero banda di esey nan tin otro tipo di entrada tambe. E entradanan aki ta haci cu nan nivel di entrada ta hopi mas halto cu un simpel pension di AOV. 

Ta e casonan di pensionadonan cu tin casnan of apartamentonan  na huur y otro tipo di entrada banda di su pensioen di behes. “Den e casonan ey, absolutamente departamento di Impuesto no ta bay kita nan for di e registro di Inkomstenbelasting”, Sra. Romano a bisa. Nan ta evalua e posibilidad aki unicamente si e persona tin un pensioen di behes so.