Francia ta un pais tradicionalmente turistico pa excelencia. E ta e destino cu ta haya mayoria di bishitante di henter mundo anualmente. Sinembargo su industria turistico ta wordo afecta drasticamente cu e serie di atentado terorista cu a tuma luga den su teritorio durante e ultimo aña y mei.
Consul honorario di Francia na Aruba, sr. Christian Mongellaz ta kere cu tur pais di mundo sin excepcion mester ta alerta na e fenomeno di terorismo internacional.
Aunke Aruba ta un isla trankil no mester lubida cu tin interes di su aliando Merca riba nos isla, considerando cu nos tin aduana y Inmigracion Mericano akinan. Terorismo awendia ta global y Aruba como un pais chikito mester ta hopi alerta, segun e diplomatico Frances.
E ta haya cu terorismo ta “un enemigo cu ta ciego, cu ta cobarde naturalmente. Nan no ta declara guera frente di bo”.
E echo cu nan ta actua sorpresivamente pa tras di cortina ta haci e tipo di grupo extremo aki uno peligroso. Ya cu nos no sa na ki momento nan ta bay dal un golpi.
