Tur mucha na Aruba merece oportunidad igual pa ricibi educacion di calidad halto

Diasabra mainta na Hilton Aruba Caribbean Resort & Casino a tuma luga e “Teachers Appreciation Conference” unda cu MGM Source a presenta resultadonan sumamente interesante di e estudio cu a wordo haci cerca maestronan y alumnonan na Aruba. Larry Bell cu ta un di e miho “motivational speakers” cu tin actual riba tereno di educacion, a percura cu henter e sala a participa activamente durante di su presentacion.

Sr. Bell a duna hopi tip cu maestronan por aplica den nan klas y a regala posternan y bukinan. Despues cu a ricibi presentacion di e resultadonan di e encuesta, sigur por mira con importante e informacion ta pa por basa un maneho riba dje, segun lider di Plataforma Pueblo Orguyoso y Respeta (POR) Otmar Oduber. ‘Awe mi a siña masha hopi mes y a ricibi hopi informacion cu no tabata conoci. Mi no ta un educador, mi no ta un maestro y mi no ta pretende di ta tampoco pero mi sa si cu esey ta e fundeshi di nos Pais. E ta futuro di e generacion cu tin cu bay carga nos Pais. Como plataforma nos a bisa cu no ta importa den cua skina, den cua bario akinan na Aruba un mucha ta y no ta importa yiu di ken e ta. Locual cu ta importa ta, cu mester tin bon enseñansa y calidad halto di educacion den tur skina di Aruba.’

Plan di accion POR den e proximo gobernacion lo Introduci un “Quality Assurance Program” (QAP). Esaki ta encera un proceso continuo unda a base di “Key Performance Indicators” (KPIs) e scolnan mes ta midi y evalua periodicamente si nan ta cumpli cu realisacion di e metanan di calidad, ta identifica y analisa factor cu ta stroba realisacion di metanan, ta tuma accion corectivo y ta raporta periodicamente na inspeccion di enseñansa encuanto cumplimento cu e QAP.

Tambe lo implementa un “Quality Inspection Program” (QIP). Elementonan principal di esaki ta, fortifica inspeccion di enseñansa pa e departamento por cumpli debidamente cu su tarea di percura pa calidad halto di enseñansa y introduci un sistema pa monitor cumplimento cu “Quality Assurance Program (QAP),unda colaboracion entre scol y inspeccion lo ta estrecho.