Tur mucha mester oportunidad pa siña toca instrumento musical

ORANJESTAD – E proyecto ‘leerorkest’- siña pa toca den orkesta ta un iniciativa di musico y docente di musica Johnny Coes, pa trece esaki na Aruba. Den luna di december el a tuma contacto cu Marco de Souza, pa mira asina kico ta e posibilidad pa haci e proyecto posibel.

De Souza ta e fundador di leerorkest na Hulanda. E proyecto tambe a yega Corsou, y aworaki na Aruba, cu segun Croes ya a firma un acuerdo di cooperacion entre minister Armando Rudy Lampe (RED) hunto cu minister di husticia Andin Bikker (POR) y Hulanda cu Stichting Leerokest.

Johnny Croes ta bisa cu e iniciativa a bin pasobra awendia tin e necesidad pa bin cu mas cosnan cu mucha por involucra den dje. “Tin deporte, pero no tur mucha ta den deporte.” Esaki ta un oportunidad pa tur mucha tin e chens di toca instrumento, pa ta den musica ‘specialmente un orkesta nos no tin ainda’.

E proyecto ta duna oportunidad pa les, principalmente pa esunnan di menos recurso. “Esunnan mas vulnerabel den comunidad. E ta bon pa desaroyo y pa preveni cu e mucha por bay den un direccion robes”, Croes ta splica.

Segun Croes, musica ta haci un mucha contento, y mucha contento tin un comunidad contento, y asina nan por contribui na sociedad y un miho desaroyo como ser humano. Un miho comunicacion. E ta bisa cu mester tin mas forma pa creatividad.

E ta un proceso educativo unda cu pa varios aña De Souza a cuminsa cune na Hulanda, pa wak cu mester un cambio den e parti cu tur mucha tin e derecho di por siña musica, y por toca un instrumento. “Nos ta kere cu musica ta bon pa desaroyo di cada persona”, De Souza a bisa.

E forma nobo pa siña musica, segun De Souza ta bisa e ta un sentimento den kere den e arte di musica, ‘e ta hunga cu bo emocion’. E ta remarca cu tur decision ta basa riba emocion.

Pa e leerorkest, e mucha lo siña canta, e teoria di musica. E ta yuda mucha con pa lesa nota, anto ta yega pa nan por sa con pa siña un instrumento. Locual ta trata tecnica y posibilidad, yuda e mucha tende musica.

Segun De Souza, e concepto pa siña leerorkest ta di 0 pa 88 aña. Na Hulanda nan tin hoben, pero na Aruba lo cuminsa pa 7 cu 8 aña, pues esunnan di basisschool, y esaki lo ta despues di scol cu e mucha ta haya les pa toca. Nan ta cuminsa e proyecto piloto cu algun scol, pa asina nan por sa kico bay bon y den kico por mehora, pa haci cambio.

Ora cu e mucha bay su les di musica, e ta siña canta y sa e instrumento cu e kier toca. “Nos lo laga e mucha purba diferente instrumento. Ta importante pa e mucha mes kies cua e gusta. Esey e ta cuminsa toca”, e ta splica.

Musica ta pa tur hende, De Souza ta bisa cu e ta un idioma cu ta yama atencion, algo cu ta papia cu hende ‘un idioma internacional’. E ta splica cu ora tin festival, hende ta siña conoce mas y ta papia di musica.

Hopi biaha ta tende e comentario cu musica clasico no ta leuk. Sinembargo, De Souza ta bisa cu un mucha ta custumbra door di wak pelicula of television unda e musica ta instrumental. E ta bisa cu e no ta algo cu e mucha ta bisa cu e no gusta musica, pero djis cu e mucha no ta haya oportunidad pa purba di haci musica pa nan mes.

Sinembargo, e mucha no mester tin super talento of un futuro como solista, bira un profesional pa dedica riba dje. “Mescos cu sport, e mucha no mester bira un profesional, pero e ta importante pa e haci e, y mescos cu cualkier cos den arte, comunicacion, tur cos cu ta uza den bida. Tur hende mester un chens pa logra.”

Tradicion y pensamento di e arte di musica ta bisa cu e ta pa cierto hende. Pa e motibo ey, arte ta keda apart, y hende ta bisa cu arte no ta pa nan, pues nan no ta busca. Pero e ta bisa cu na momento cu ta duna e mucha oportunidad pa siña importancia di un orkesta, nan ta siña disfruta musica; pa e motibo aki nan ta disfruta tur musica cu nan ta encontra rond di nan. E ta un conexion, y pa siña cierto nivel pa experiencia ta algo cu mester keda pa bida henter.