Den e crisis cu a genera e decision di e organisacion cu ta representa e sector hotelero na Aruba, esta Ahata di retira su tres miembro fei di hunta di supervision di Oficina di Turismo di Aruba (ATA), directora di e oficina aki, sra. Ronella Tjin Asjoe -Croes a remarca cu cada miembro sa cu nan tarea principal ta di supervisa.
Otro tarea ta esun pa supervisa cu “bo pechi di turismo” e maneho nacional di turismo, esaki conforme e ley di ATA y tambe e codigo di “corporate governance”.
“Cada miembro sa cu ora bo ta un miembro di hunta di supervision bo tarea principal ta pa supervisa. Pero tambe pa supervisa cu bo pechi di turismo di maneho nacional y di bienestar nacional, y no con bo pechi pa ehempel di Ahata…”, el a laga.
Directora di ATA a laga sa cu nan ta remarca semper e parti di bienestar general di turismo cerca e miembronan di e hunta aki durante e ultimo lustro, y e conducta aki ta tipifica e hunta di supervision di ATA.
Tur decision cu a wordo tuma ta conforme e maneho nacional di turismo cu conforme e mesun ley, e tarea principal di ATA ta esun di ehecuta e maneho aki. Sinembargo nan ta duna nan aportacionnan riba maneho y nan ta yuda formula locual ta miho pa pais Aruba.
“Pero na tur momento bienestar general lo mester resalta ora di tuma di decisionnan denter di ATA”, segun sra. Tjin Asjoe-Croes. E maneho aki ta prevalece ora cu nan mester dicidi riba diferente actividad tambe.
E resultadonan di nan trabou ta aparece den e diferente rapportnan, pero mester ta consciente cu ATA como autoridad di turismo “ta operando na manera serio… Y ora cu ta trata di maneho ta un asunto serio y nos ta tuma como tal”, el a bisa.
E hunta di supervision aki ta consisti di 7 miembro y cada miembro cu a wordo nombra a conta cu aprobacion di minister di Turismo, kende tin e decision final, segun e ley cu ta regarda ATA den su status huridico actual como un empresa Sui Generis.
Den e hunta aki, Ahata tin 3 asiento caminda pa cada asiento Ahata ta propone dos candidato pa cada asiento na consideracion di e mandatario encuestion manera ta bin sosode durante e ultimo 5 aña di ATA Sui Generis. E hunta aki a yega di conta cu diferente candidato cu a representa Ahata.
