Tur instancia mester paga pa tent; DOW ta haci excepcion pa entiero so

ORANJESTAD – Keho ta wordo haci den direccion di DOW, contra e cobramento riba e tent pa instancia caritativo, cu nan ta facilita pa nan eventonan. Director di DOW, Marlon Croes a bin cu un aclaracion recientemente riba e procedura y pago aki.

Pa un tent comercial mester paga 100 florin pa e huur di cada dos dia. E deposito pa cada tent tambe ta 100 florin. Test no comercial pa instancia caritativo, por ehempel un scol, tin un prijs di 80 florin pa dos dia y 100 florin di deposito pa cada tent.

Mientras pa podium ta 58 florin pa cada dos dia pa cada pida di podium. Tambe DOW ta exigi un deposito di 100 florin pa nan. Pa baricada, e prijs ta 4 florin pa pida palo, y pa stand tambe e mesun prijs pa cada dos dia. Nan ta exigi un deposito di 25 florin pa cada un. E unico cu tin un excepcion riba pago, ta ora ta trata di entiero. Croes a laga sa cu pa entiero nan tin un maneho cu e servicio aki ta totalmente gratis, y e ta pa dos dia di uzo so.

E maneho pa e fundacion ta otro, esaki ta depende di e meta di nan actividad. DOW ta evalua si esaki tin un balor comercial of un balor di 80 florin, manera esunnan di instancianan caritativo.

Peticion directamente cu DOW
El a bisa cu e regla pa atende cu e proceso di peticion di tentnan, baricada y podium, tur esaki mester wordo entrega na DOW mes. Nan mester haci uzo di un formulario disponibel na DOW. Tambe esun interesa, por bah’e via DOW su Facebook.

Pero pa haci uzo di esaki, e peticionario mester haci pago di huur y laga un deposito na DOW, prome cu nan ta entrega loke a wordo solicita den un adres specifico. Otro costo di servicio di transporte cu e peticionario ta desea, esaki ta wordo calcula pa DOW mes. Tambe esaki mester wordo paga prome, pa asina DOW por cumpli cu e servicio di transporte.

Prome cu cambio di aña, mayoria di e peticion aki tabatin full un proceso burocratico, prome cu e yega unda e mester yega. Prome cu dia 20 di februari, mayoria di peticion tabata pasa via e ministerio y drenta despues na DOW, unda nan ta evalua con nan ta bay ehecuta e peticion aki.

Awor a keda palabra cu e ministerio en cuestion cu tur peticion mester pasa directamente via DOW. E peticion mester wordo entrega 10 dia minimo prome cu e evento. Croes a splica cu si e peticion wordo entrega un dia prome cu e evento, por ehempel un diabierna atardi pa un evento diasabra, e ta forsa DOW di bay draai overtime. Esaki ta aumenta nan gasto operacional pa DOW por duna e publico e servicio solicita. Si nan por haya e solicitud aki na tempo, nan por planifica den orario di trabou, y asina entrega ya sea e tentnan, baricadanan y podium den oranan di trabou mes. “Asina nos por baha nos gasto operacional,” el a bisa. Pero tambe maneha nan capacidad miho.

Tambe e peticion cu ta drenta prome lo wordo atendi prome. Igualmente peticion pa eventonan di gobierno tin prioridad riba esunnan di tercera persona.