Stanley Dabian di Departamento di Cultura di Aruba (DCA) kende tambe ta miembro di e Comision Celebracion Dianan Nacional (CCDN) a haci un apelacion den cuadro di Dia di Betico, pa henter pueblo di Aruba hisa e bandera di nos pais cu e color corecto manera e ley mes ta prescribi.
Sr. Dabian ta laga sa cu ta bon pa nos corda cu for di 1 di januari 2015 e ley cu a keda aproba pa trece uniformidad riba e color di nos bandera a keda aproba. Caminda e color blauw ta Pantone 279C. “Kiermen percura pa henter pueblo di Aruba hisa e bandera den color corecto.”
E ta bisa cu manera e ley aki a keda aproba, DCA hunto cu CCDN y otro instancia manera duana y polis, nan ta trahando riba un foyeto cu pronto lo wordo introduci cu tur informacion riba e contenido di e ley di bandera. Pero cu e boet tambe pa esunnan cu no ta cumpli debidamente cu e ley aki.
Sr. Dabien tambe ta splica cu tur persona cu tin pensa di importa bandera mester busca un permiso na DCA. Ya cu bou asignatura di ministerio di Cultura, DCA a keda asigna pa aproba e firma e peticion aki, tanto di importacion como di benta. Pues esun cu no ta importa e bandera, pero si ta bende e bandera ta importante pa nan pasa na DCA na L.G. Boulevard 134 (piso 1) pa busca nan permiso pa por bende e bandera.
Inspeccion y implementacion di ley
E ta informa cu dos funcionario pronto lo keda asigna pa realisa e debido trabou di control y inspeccion riba e establecimentonan cu ta bende bandera. Segun sr. Dabian, den e caso di bandera di Aruba cu ta un bandera nacional, nan a opta cu e prome dos pa tres aña pa bin cu un campaña di conscientisacion prome.
Nan ta haya oportuno prome bin cu un conscientisacion, ya cu e ta un punto delicado pa hopi hende, pero henter pueblo di Aruba mester ta consciente cu tin un ley vigente cu ta regarda asunto di bandera nacional. Despues di e periodo di gracia of di conscientisacion lo bin cu dos persona cu lo ta encarga cu asunto di reforsa e ley aki di bandera hunto cu polis y duana. “Tanto pa duna sancion of den caso di importacion cu e ta robes, nan ta tum’e den confiscacion.”
Sinembargo e no kier alarma tur hende ya cu tur esakinan ta un proceso cu ta canando ainda, pero si pronto tur cos lo wordo ehecuta. E ta conseha pa e hendenan busca nan bandera na Centraal Magazij na Sabana Blanco of tambe den e instancianan cu tin e logo of escudo di Aruba pa bo ta sigur cu bo tin e color exacto di bandera. Tambe e ta conseha pa esunnan cu ta decora nan oficina of establecimento comercial pa haci’e bunita den e color corecto actualmente di e bandera di Aruba.
