Awe Merca su pueblo lo eligi un presidente nobo cu lo administra e destino di nan pais durante e proximo cuater aña. Esaki ta e di 58 eleccion presidencial na Merca entre un candidato femenino Democrata, Hillary Clinton y e empresario Donald Trump. Bon Dia 24 tin un poll riba su Facebook caminda usuarionan por vota pa nan candidato faborito, haciendo uzo di #Clinton of #Trump.
E eleccion aki a wordo cualifica como esun mas tenso y polarisa entre dos candidato cu ta busca conkista e Cas Blanco. Aunke e encuesta mas recien a mustra un bentaha chikito di 1% na fabor di Clinton, despues cu FBI a exonera e candidato Democrata di cualkier acusacion riba mandamento di e-mail for di un server priva, no autorisa.
Sinembargo e encuestanan ta mustra un empate tecnico entre e dos candidatonan locual ta crea un escenario politico –si eventualmente e ta sosode awe- manera esun cu a sosode entre e Republicano George W. Bush y e Democrata Al Gore na aña 2000. E resultado tabata asina cera di apenas 548 voto, danki na e votonan di e comunidad Latino di Florida cu a duna Bush e oportunidad di bira presidente na Merca.
Aruba y region
Ayera Bon Dia Aruba a tene un entrevista cu e Relacionista Publico y ex Editor di Aruba Today, Julia Renfro kende ta un ciudadano Mericano residencia pa basta aña na Aruba; y kende actualmente ta na Florida.
E ta haya cu Trump ta un candidato faborabel pa Aruba y nos region su relacion cu Merca. Aunke e ta consciente cu mayoria di nos hende na Aruba ta na fabor di e candidato Democrata, ya cu e tin cantidad di amigo den su Facebook page y mayoria di nan ta pa Hillary. E ta haya cu e preferencia aki ta debi cu nos hendenan ta uno hopi familiar y nan ta wak den Hillary un persona serio y hopi bon… mientras cu Trump ta un “loco”.
E no ta culpa cu nos hendenan tin e percepcion aki cu e medianan grandi a promove di Trump. “Kico ta e miho pa Aruba?. Pa mi Trump!”, el a bisa. E rason ta cu Merca ta bay subi, ya cu e ta un businessman cu lo crea hopi trabou akinan pa medio di deal cu China, Mexico y otro paisnan. E situacion aki lo facilita pa e Mericano por biaha y nan por disfruta su placa na Aruba. “Trump ta bay mehora economia di Merca. Y ora Merca ta bon, Aruba ta bon”, el a declara.
Florida
Renfro a bisa cu sin duda den eleccion aki e voto Latino na Florida lo hunga un rol importante pa defini kende lo reemplasa Obama. Un encuesta di Universidad di Quinnipiac a revela un situacion di empate entre e candidata Democrata y su rival Republicano, na Florida y Nort Carolina, dos estadonan crucial den eleccion aki.
Renfro su opinion personal ta cu e aña aki ta esun mas importante pa Merca durante e ultimo 100 aña. “E motibo ta cu Hillary ta un persona cu hopi experiencia, pero e ta pro di globalisacion, y esaki kiermen sin frontera…”. E idea aki no ta haya e sosten di un gran mayoria di e pueblo Mericano cu ta sostene Trump, pa evita e situacion cu actualmente Europa ta pasando aden cu e ola sin control di inmigrantenan cu ta bin di Siria y Medio Oriente.
“E Sr. Trump ta contra di esey. Esaki ta e diferencia!”, el a bisa. E ta haya cu globalisacion ta e topico cu a marca un diferencia entre ambos candidato den e eleccion aki compara cu eleccionnan anterior.
Tambe tin otro punto cu ta marca un diferencia entre un candidato y otro riba topiconan relaciona cu aborto, impuesto, etc… cu ta topiconan cu semper ta aparece den e agenda di cada eleccion na Merca.
Clinton tin un bentana na Trump pa un punto na Florida (46/45 %) y na Nort Carolina e diferencia ta di dos punto (47/45 %). E encuesta aki a wordo haci entre dia 3 pa 6 de november cu un margen di eror di alrededor di 3,3 punto pa ambos caso. Renfro a bisa cu e ambiente na Florida ta hopi “serio”, y ya caba e votadonan a cuminsa manda nan votonan caba.
“Tur hende sa Florida ta make of break Merca”, el a bisa. El a trece dilanti cu na aña 2012 e estado di Florida ta esun cu a defini e eleccion entre Mitt Romney y Obama. “Si Romney por a gana Florida e tabata e presidente aworaki ainda”, el a bisa. Pero e aña ey Obama ta esun cu a gana na Florida danki na e voto Latino. El a laga sa cu mas cu un 80% di e Latinonan na Merca a vota na fabor di Obama.
“E Latino a pone Obama den White House”. E ta premira cu e aña aki mesun cos lo bay sosode. “Ora Florida no ta bay cu Trump, Hillary ta bay gana. E Latino ta na Miami, Orlando, Tampa, na tur luga. E ta yen yen!”. Na 2012, ora cu Obama a wordo reeligi como presidente di Merca, Florida a vota mas cu 8,5 miyon di persona.
Discriminacion y Latinonan
Encuanto e discurso discriminatorio di e candidato Trump entre otro contra e Latinonan, Renfro a señala cu e voto Latino ta esun mas importante den eleccion aki. E ta haya cu e Latino ta vota masivamente pa partido Democrata. Mientras cu e ciudadano di Afro-Mericano ta un poblacion di votado cu a keda hopi chikito.
Actualmente Renfro ta na Orlando unda el a papia cu hopi Latino na bispo di eleccion di awe, y tur ta bay cu Trump. E ta haya cu e media ta esun cu ta traha un imagen di Trump como racista y cu no ta gusta Latino. Renfro ta haya cu e no ta berdad. El a bisa cu Trump tin hopi hotel yen di Latino tanto clientenan como empleadonan. Ademas tur hende cu no ta tras di tur loke ta wordo bisa den media tin speransa cu Trump lo crea mas fuente di trabou.
Segun Renfro, Trump no ta discrimina contra hende Latino of di otro rasa of nacion, pero e candidato presidencial Republicano ta contra inmigrante ilegal. “E no kier ilegal!. E kier cu e hende bin y pone nan papel den ordo”. Ya cu si nan ta keda ilegal nan ta bay den baho mundo y criminalidad. E ta haya cu e problema cu Trump ta cu e no ta politico y e ta papia hopi bruto.
