Diamars durante un conferencia di prensa fundacion Bernadina Growell-Kock a anuncia su proximo festival di canto dedica na Mama di Cultura Bernadina Growell-Kock.

E festival lo tuma luga dia 22 di juli venidero di 8:00pm pa 1:00am na Centro di Bario Brazil, na unda cu presidente di e fundacion Mervin Wyatt-Ras a relata cu a inicia cu e festivalnan aki na aña 2011.

Wyatt-Ras ta menciona cu e ganadonan di e festivalnan anterior a haci un bon papel y el a trece dilanti cu fundacion ta hopi agradecido na tur esnan cu semper a duna sosten, aunke no por depende mucho di ayudo financiero, nan si a haya bon sosten di Departamento di Cultura. Entre otro tambe di John Freddy Montoya, kende semper ta yuda nan, ademas di e cooperacion di Centro di Bario Brazil y di esnan cu ta aporta mas na e festival cu ta comunidad cu ta acudi grandemente.

El a elabora encuanto e metanan, entre otro, ta pa conserva tur loke e mama di cultura a laga tras, reconocimento y balor na loke el a haci pa Aruba, conscientisa comunidad encuanto su logronan, conserva y fortifica cultura.

Trabounan cu fundacion a haci te awor ta drecha cas di Bernadina cu locual atrobe nan ta bezig, a coloca un relieve na Paseo Herencia acompaña pa un Parada Cultural, a duna un caya nomber di e Mama di Cultura y ta participa tur aña na paradanan cultural. Anualmente ta organisa un festival cu excepcion di un par di aña, ademas a publica un buki conmemorativo di Mama di Cultura.

Segun presidente di e fundacion ta premira cu e biaha aki tambe e festival lo ricibi e acogida necesario y fundacion ta sumamente agradecido na tur miembro di e fundacion y boluntarionan cu ta duna e sosten tur biaha.

Secretaria Magdalena Orman-Yarzagaray a duna mas detaye encuanto e participantenan y di otro rekisitonan pa cu e festival aki. Ganadonan di festival di 2011 tabata Betty Werleman, 2012: Bertha Willems, 2013: Bertha Wolf, 2014: Jeristsa Croes, 2015: Giana Wester, 2016: Jason Kelly y 2019 Maria Anonieta Ras-Booi.

Entrada ta costa 10 florin general y carchinan lo ta obtenibel cerca miembronan y participantenan, segun el a afirma, tin 5 agrupacion musical cu ta bay participa y tin ya caba 16 participante cu a inscribi manera Un brindis, Tipico Palisia, Grupo di Antaño Tipico Pegasaya y Tipico Cariño.

Dia 5 di juli venidero na cas di Bernadina nos ta bay haci e trek lot y te cu dia 5 di juli tin oportunidad ainda pa inscribi cerca Orman-Yarzagaray na telefon: 5651145 y tambe cerca Jose Orman telefon :5614450.

Bernadina tabata hende di tur hende, ta e mama di Cultura di henter Aruba y a duna presentacion den tur bario na Aruba y hasta internacional, ora tin festival por a nota cu di tur caminda comunidad ta uni pa bin presencia e festival, manera Wyatt-Ras a indica.

Persey Jeandor a splica cu henter Aruba por participa na e festival cu cancionnan den nos lenga Papiamento y no comunidad di Brazil so, el a gradici tambe cu Chichi Perez cu coro La Escala ta bay dedica 5 cancion pa habri e festival aki.

Betty Werleman a conta di su experiencia como prome ganado di e festival na aña 2011, na unda el a haya oportunidad di canta na desvelo di e borchi di Caya Bernadina Growell-Kock y tabatin e honor di presenta hunto cu Sodo y Cuero e cantica “Ayoo mi Dudu”. Segun Betty a bisa “danki na cu mi a gana e festival te awe mi ta integrante di Sodo y Cuero. E experiencia di e festival ta uno di kita sombre pasobra te awe mi ta den e parada, mi ta canta y actualmente mi tin un grupo di tambe cu mi subrinonan, cu mi nietonan. Mi ta all the way y mi ta gosa semper den tur parada cultural tambe”.

Maria Antionieta Ras-Booi a gana festival di Bernadina na 2019 cu e cancion di “Bernadina nos mama di cultura”, di esaki, el a expresa cu nan ta invita tur pa bin engrandece e festival aki, “mi experiencia den e festival aki tabata super bunita y ta dushi pa canta nos cancionnan di nos hendenan di Aruba. Yega bin haci e festival grandi. Di pariba of pabou, welcome bo ta”.