Peticion di ningun hende a yega cerca mi pa 90 mil meter cuadra, esey Minister Sevinger encarga cu Infrastructura a bisa den caso cu partido Mep ta mencion cu Sra. Arends lo a ricibi. Banda di esaki el a enfatisa, cu tur persona cu kier mira ken tin tereno, por bay hypotheek kantoor pidi pa e informacion aki, y nan lo haye. Asina nan lo tin prueba cu nan por uza pa publica. Den caso cu nan ta haya cu algo contra ley lo a tuma luga, nan por entrega denuncia tambe.
“Mi ta kere cu na Aruba ningun hende lo haya opcion pa 90 mil meter cuadra, pa nos ta cla cu esaki. E Sra. Arends por entrega un peticion pa e tereno si, mescos cu tur otro hende tin derecho riba dje. Pero cerca mi no tabatin ningun carta pa 90 mil meter cuadra.”
Proceso normal
“Tur ciudadano tin derecho pa haci peticion pa un tereno aki na Aruba. Si nan manda u carta pa mi, mi persona ta evalua esaki y tuma un decision di mi parti. Por ehempel, si un ciudadano pidi pa un tereno pa desaroyo comercial, mi ta wak ki area e persona a pidi y tin posibilidad den e area, mi ta manda bisa departamento cu di mi banda no tin ningun obhecion pa si tin un tereno duna e persona aki. Si ta pa huur mesun cos y si ta pa as mesun cos.”
Despues di esaki e mandatario a splica cu e departamento ta sigui cana cu e proceso, por pasa cu departamento ta bin bek y bisa cu pa loke ta e tereno specifico cu un persona pidi, e no por haya esaki door cu por ehempel e area ta den ‘natuur gebied’. Nan ta avisa minister den e caso ey y nan ta avisa na e ciudadano cu e no por haye pa tal motibo. “Sinembargo si un persona por haya e tereno ta dun’e un opcion. Den e opcion ey tin poni kico ta e rekisitonan cu un persona mester por cumpli cun’e pa e haya e tereno aki. Manera pa comercial ta encera un business plan, mapa na DOW, garantia di banco, mustra cu tin placa pa construi e proyecto, rapport di medio ambiente y parti social den e area etc. Si cumpli cu tur esakinan e ora ta bay notario y bo por haya e peticion di erfpacht pa cuminsa cu e proyecto. Facil pa haya un opcion, ta ora cu mustra cu por cumpli, por bisa cu e persona a haya e tereno berdad.”
