Tur hende mester ta safe ora cu ta cumpra y bende klapchi

E temporada di klapchi ta uno dushi, pasobra hendenan ta haya e oportunidad di tira klapchi te den oranan laat di marduga. Pero tin persona ta lubida riba e parti di siguridad no solamente pa nan mes, sino tambe pa tur esunnan cu ta rond di nan. Loke cu ta importante ta cu e luganan di bende klapchi mester ta sigur no solamente pa nan, pero tambe pa e cumprado y e negoshi of cas cu tin na banda.

Aunke cu e comision di klapchi ta pasa controla diferente luga pa mira cu e bendedonan a cumpli cu e rekisitonan cu ta wordo exigi. Pa e comision di klapchi ta importante cu tur hende nan bida ta safe. Pero pa un hende nan bida ta safe, no solamente e bendedonan di klapchi mester wanta nan mes na e exigencianan cu e comision tin, pero sino esunnan cu ta bay cumpra klapchi tambe mester ta cauteloso. E pregunta ta bin pakico mester ta cauteloso? Esaki ta bin cu den añanan anterior a yega di pasa accidentnan grave cu klapchi. Den pasado hende a perde parti di nan curpa, pero den e ultimo añanan por a tende cu incidentenan cu klapchi a baha. Tur aña e comision ta keda ripiti pa tur hende tene cautela ora cu cende nan.

E aña aki un biaha mas Sr. Frido Dirksz di departamento di Prevencion di Brandweer ta pidi tur adulto pa paga tino ora cu nan cumpra klapchi pa muchanan bou di 12 aña pero tambe pa nan mes. Durante e control cu lo ta tumando otro siman, un biaha mas nan lo mira cu e klapchinan no ta peligroso. Tur klapchi cu ta wordo treci ta bin cu un instruccion y e instruccion aki mester ta na un idioma cu ta comprendibel pa tur hende. Si a caso e instruccion no ta comprendibel, e comision lo bay cu e klapchi y test esaki pa mira con e ta traha, segun Sr. Dirksz.

Lista di control
Durante e control e bendedonan di klapchi mester tin e lista di control. E lista aki tur miembro di e comision mester yena cu nan a pasa y indica cu tur cos ta na ordo of no. Cada miembro di e comision tin nan parti pa controla e luga di bende klapchi. Por ehempel polis su trabou ta pa controla cu tur e bendedonan tin nan permiso na ordo, DTI ta controla cu e coriente ta bon, mientras cu Brandweer ta controla si e extinguisher ta bon y hopi mas. Aunke cu tur e miembronan di e comision tin nan parti di control, asina mes nan ta tira bista riba otro areanan.

P’esey ta importante cu riba e dianan di bendemento di klapchi, e lista di control ta wordo poni den bista cu tur hende por mira cu nan tin permiso pa bende. E bendedonan cu no tin permiso pa bende of cu su papelnan no ta na ordo, automaticamente nan lo wordo cera.

Distancia entre luga di klapchi y negoshi/cas
Tambe ta importante pa e bendedo di klapchi sigui tur e rekisitonan di e comision. Tin un exigencia di con leu e luga mester ta di un negoshi of cas, incluso di caminda. E bendedonan mester por tin tur metodo pa preveni un candela. Esaki ta algo cu Brandweer ta stress riba dje. Ta importante cu e container di klapchi ta keda 4.50 meter leu for di e cas of edificio.

Sr. Dirksz a bisa Bon Dia Aruba, ora di bende klapchi no mag di bende mucha bou di 12 aña. Tambe den e luga di klapchi no mag di tin mucha bou di 16 aña. Incluso no mag tin baby mes den e luga. “Mi ta urgi mayornan pa cumpra klapchi consciente. Cumpra klapchi cu ta corecto pa mucha,” e ta bisa Bon Dia Aruba. Por cuminsa bende klapchi desde ora cu solo sali te cu 11’or di anochi. Dia 31 di december por bende klapchi te cu 9’or di anochi.