Na Aruba actualmente tin registra 752 persona HIV positivo for di aña 1987 pero ta wordo calcula cu e cantidad di persona infecta cu e virus di HIV por mas cu e cifra oficial aki. Di e cifra aki tin personanan cu no ta biba mas na Aruba of algun di nan a fayece caba.
John Henriquez kende ta traha den e seccion di malesa contagioso di departamento di Salubridad Publico (DBZ) ta recorda cu Organisacion Mundial di Salud (WHO) ta remarca cu cada caso nobo bo tin cu multiplica nan pa 10. Pues no ta wordo descarta cu e por ta rond di 7 mil persona cu ta cada rond cu HIV.
Test
Den cuadro di Dia Internacional Contra AIDS cu a wordo conmemora dia 1 di december ultimo seccion aki ta encurasha tur hende cu tin duda riba su status pa bin haci e test pa check si e ta contagia cu e virus HIV of no. Apenas un total di 77 persona so a bin haci test cerca nan na 2016. “Mi kier encurasha tur persona cu ta tene relacion sexual y nan no ta haci uzo di proteccion, please bay haci bo test”.
Na 2017 tin alrededor di 54 persona so te cu aworaki cu a haci e test cerca nan. Di esunnan cu ta haci test na DVG nan tin un averahe di 1 pa 2 persona cu ta resulta HIV positivo. Ora cu nan ta detecta un caso nobo nan ta duna conseho y nan ta pone e persona den contact cu un di e internistanan pa bin cu mas testnan cu e persona aki.
Sr. Henriquez a bisa cu tur persona cu ta sexualmente activo y no ta haci uzo di proteccion ta recomendabel pa haci e test aki. Tin persona cu no kier haci e test aki pa berguensa. Tambe nan no kier sa tampoco kico nan status ta.
Sinembargo e ta haya cu ta bon pa bo haci e test aki pa asina bo sa kico bo status ta. Si ta asina cu bo ta HIV positivo, bo por bay cerca un dokter pa haya e ayudo of tratamento rekeri den un caso asina.
“Bo ta na tempo. Bo ta bay un dokter, y dokter por yuda bo pa bo por haya tratamento di igual manera cu bo bida por sigui normal”. No ta pasobra bo a wordo infecta cu e virus HIV, esey no kiermen cu bo carera riba e bida aki a caba.
Segun sr. Henriquez un persona cu HIV por hiba un bida normal danki na tratamento y remedi basta avansa. Logicamente ta duro pa un persona confronta e echo di ta HIV positivo. “Pero bo tin cu haci bo mes duro pasa over di dje. Bay cerca un dokter, tuma bo tratamento y bo bida por sigui normal.”
Secresia
E test aki ta wordo haci ya sea na dokter di cas, DVG y laboratorionan ya sea di hospital of esunnan priva. E ta un test anonimo caminda bo datonan personal of identidad ta keda reserva den secresia.
E personanan cu generalmente ta bin cerca nan pa haci test pasobra dado momento nan ta scucha cu tal persona por tin algo y miho nan ta bay haci test. Tin di nan cu ta bay pasobra nan tabatin relacion sexual y e condon a kibra.
Tambe nan ta bin test pasobra otro persona cu nan tabatin relacion sexual cu ne ta encurasha nan pa bay haci test miho. Tin biaha tin personanan cu ta bin cerca nan pasobra nan ta admiti cu nan tin relacion sexual sin uzo di proteccion absolutamente. Generalmente e persona cu tin un conducta sexual asina ta bin un biaha pa aña pa haci e test na DVG.
Tur aña tin caso di HIV nobo pero ultimo tempo nan ta ripara cu e casonan di malesa contagioso transmiti sexualmente ta subiendo, entre nan clamidia, gonorea, sifilis, etc… Esaki ta refleha cu dado momento e personanan no ta haciendo uzo di proteccion manera condon. Of nan no ta hacie di e manera debido pa evita malesanan asina. “Si dado momento bo ta proteha bo mes bon, bo no ta yega na un di e malesanan aki”, el a bisa.
Proteccion
Banda di esey el a indica cu ora Wit Gele Kruis (WGK) ta duna e data di e embaraso hubenil bo por wak cu pa aña por tin un grupo di 90 cu por a sali na estado. “Bo ta wak cu nan no ta haci uzo di proteccion”, el a bisa. Awendia e muchanan ta activo sexualmente na un edad basta tempran. Pues e ta haya cu e grupo mas activo sexualmente por baha un tiki mas cu 20 aña te cu un averahe di 35 pa 40 aña.
Tambe awendia hopi persona 60 plus ta sexualmente activo debi na productonan di potencia sexual manera Viagra. Sinembargo apesar di nan edad nan no ta haciendo uzo di proteccion.
Encuanto e ser femenino tin algun di nan cu ta bisa cu nan ta uza ‘the pill’. Pero banda di esey nan mester haci uzo di proteccion pa evita cu bo por haya HIV of un di e malesanan transmiti sexualmente.
Sr. Henriquez a bisa cu nan ta dunando hopi charla na scolnan y empresanan priva. Tambe na momento cu nos ta drenta den temporada di carnaval, nan ta duna charla conhuntamente cu FADA. Nan ta organisa un carrousel cu ta inclui cierto scolnan secundario pa informa y conscientisa nan riba e malesanan transmiti sexualmente.
