Durante diaranson y diahuebs di e siman aki, dianan 20 y 21 di April, Federacion di Trahadonan di Aruba (FTA) a tene su prome Congreso Extra Ordinario pa 2016.Tabatin un bon participacion di delegadonan y un agenda pisa y bon carga di topiconan.
Un total di 48 delegado representando tur sectornan afilia den FTA a reuni hunto, y nan a trata e relatonan presenta pa e Directiva di FTA. Nan a trata e Relato di desaroyonan den e sectornan den FTA, Relato di formacion y organisacion, Relato di KDC y DAHU y pa e ultimo aki a conta cu presencia di Abogadonan Figaroa y Faarup. Alabes a repasa e notula di e ultimo Congreso Extra Ordinario di 2015.
Tambe e Congreso Extra Ordinario aki a conta cu presencia di Presidente di Camara di Comercio, Sra. Daphne Lejuez, kendeduna un presentacion di e resultado di e encuesta cu Camara di Comercio a haci pa loke ta e asunto di parkeer den centro di Oranjestad.
Serlimar y Parkeer meter
Directiva di FTA a presenta tambe su plan di accion pa atende cu e asuntonan di Serlimar y Parkeer meter. E dos puntonan aki a wordo profundamente atendi durante nan congreso extra ordinario di dos dia.
Lider sindical di FTA, sr. Hubert Dirksz a declara na Bon Dia Aruba cu e dos asuntonan aki mester wordo trece den balansa cu participacion di tur e gremionan. “Mas cu rond mundo bo ta paga, pero ban pone e cosnan den balansa, ban scucha otro, ban haci e cos corecto…”, el a bisa.
Arupark a wordo lanta -segun FTA- ya cu Arubus ta spera cu esaki lo por genera 9 miyon pa atende e deficit den su gastonan; y tambe pa yuda e situacion di parkeer den centro di ciudad. El a bisa na Bon Dia Aruba cu FTA ta “apoya totalmente” e iniciativa aki, y nan a yega di informa nan posicion na minister en cuestion.
Tambe FTA a bisa cu mester bini cu e parkeer garashinan ya cu nan ta haya cu nan ta haya cu e ta un bon sistema. E mesun posicion nan tin relaciona cu e cobramento di Serlimar pa recoge sushi domicilio, ya cu e departamento aki tin mester di placa, pero FTA ta reitera cu esaki mester bay di un forma “corecto”.
Participacion
“Bo mester duna e hendenan participacion y e gremionan participacion y yega na un balans y asina ey nos ta traha”, el a declara. Por cierto el a laga sa cu si ta resulta manera e ta bayendo actualmente, cu e tin su dudanan cu Aruparking ta alcansa e 9 miyon cu Arubus mester.
E ora ey manera e sistema aki a wordo introduci, bo ta haci daño na varios caminda tanto na Arubus, economia, empleadonan den centro di ciudad y tambe e turistanan cu nan autonan di huur ta wordo geklem. P’esey e ta haya oportuno pa gobierno por sinta cu e gremionan di un “manera normal” pa atende e problema. “Pero no manera e ta bayendo, FTA ta kere cu ta suficiente!”, di un forma categorico el a bisa.
E delegadonan a participa activamente den e debatenan riba tur loke a wordo presenta durante e congreso aki. E congreso aki tabata exitoso y Directiva ta gradici tur delegadonan cu a presenta y cu a aporta cu nan opinionnan y sugerencianan pa por mehora e desaroyonan den FTA.
Igualmente e puntonan di Aruparking y tarifa di Serlimar pa recoge sushi di cas cu a wordo atendi den congreso, presidente di FTA ta kere cu pronto nan lo yama un otro congreso pa duna nan delegadonan e resultado di kico ta e contesta di e gobierno. E proximo Congreso Extra Ordinario cu lo ta e di dos pa 2016, y e ta programa pa tuma luga den luna di Augustus.
