E candela registra den e dump di Tamarijn no solamente a afecta gran parti di e habitantenan di e bario aki; sino cu e muchanan di e scolnan na Paradera, mester a manda nan na cas pa causa di e huma toxico y iritante aki. E hendenan mas afecta tabata esunnan cu ta biba den e direccion cu biento ta supla e huma.
Ayera mainta, hefe di cuerpo di bombero, Edward De Cuba, ta conta Bon Dia Aruba cu nan a ricibi yamadanan for di e scolnan afecta, Maria Goretti College, Colegio Pastoor Kranwinkel y Scol Preparatorio Nos Paraiso na Paradera, ya cu nan tabatin basta molestia di e holo di huma produci pa e dump priva ey. Brandweer a manda e oficialnan di turno pa bin inspecciona y determina e situacion. Nan a ripara cu pa motibo di e candela di e dump menciona cu henter anochi di dialuna a produci holo di huma cu a penetra den e klasnan di e scolnan menciona. Tabatin residuo di e huma ariba e vloer y bakinan cu no ta apropia pa laga e muchanan sinta sin haci nan limpi prome, segun sr. De Cuba.
Doño di tereno ta keda responsabel
Considerando cu ta trata aki di un dump priva –segun comandante di Brandweer- e doño di e tereno mes mester para responsabel pa e accion di dialuna anochi caminda Brandweer a manda su trucknan pa yuda paga e candela y elimina e huma. Tur gasto mester bay riba cuenta di e doño di e tereno, unda e dump di Tamarijn ta situa. Den nos edicion di ayera e yiu di e doño di e dump, Rawi Misier a pidi disculpa na e bisiñanan y e hendenan afecta, ya cu no tabata su idea cu esaki a pasa.
Sr. De Cuba ta laga sa cu dialuna nan a papia cu e doño di e tereno caba, caminda tur accion pa controla e candela a bay den deliberacion cu ne. “E tabata un candela hopi grandi y e tabata hopi complica pa yega na dje. Na e momento ey mester a uza diferente tactica pa por a domina e candela”, el a splica. Tabatin mas instancia cu a bin aden entre nan DOW, departamento di Higiena y polis pa atende cu e asunto aki. Den cierto momento Brandweer tabatin tres unidad y DOW tabatin alrededor di 6 truck di carga grijs y dos chubato.
Scolnan afecta
Ta asina cu hunto cu e directiva di scol y consultando cu e minister encarga cu enseñansa, finalmente e mandatario a duna autorisacion pa cera e scolnan. “Asina ta duna chens pa e scolnan tur e desknan limpi completo y saca e residuonan”, sr. De Cuba ta bisa. Intencion ta cu awe e muchanan por bay scol bek den un ambiente limpi sin haya efecto di e residuonan di e huma toxico. Pero SKOA a emiti un comunicado cu e scolnan menciona ariba lo keda cera te dialuna proximo.
For di dialuna caba tabatin muchanan y docente cu tabatin molester di garganta y cu wowonan cu ta pica pa efecto di e molester di e holo di huma. Sr. De Cuba a probecha e oportunidad pa gradici e personal di DOW cu hunto cu nan a bay den accion te cu 12’or di mey anochi pa purba di alivia e situacion cu ayera a pesar di e residuo tabata mas clear di e huma y e candela a paga. El a bisa cu for di dialuna mey anochi e candela tabata controla. Sinembargo ayera tabatin dos fuente di huma cu tabata sali ainda; y cu e personal tabata purba di tapa nan.
Na final el a conseha tur hende den e bisindario aki cu ainda nan ta sinti holo of molestia di e huma ta preferibel pa purba keda paden y wak bo si a keda residuo di stof di huma ariba nan mueblenan pa haci nan limpi. Pasobra e ta keda un fuente di irita y molestia e habitantenan di e cas, si nan no ta haci nan limpi.
