Ayera tardi durante un reunion publico presidi pa prome biaha pa e vice presidente di Parlamento, Alan Howell a keda eligi, Juan “Ady” Thijsen como presidente di e organo legislativo aki.
15 parlamentario a participa den e votacion aki, 9 di fraccion di MEP, 3 di AVP, 2 di POR y 1 di RED. Un comision integra pa tres parlamentario: Rocco Tjon (MEP), Ricardo Croes (RED) y Robert Candelaria (AVP) tabata encarga cu e contamento di voto.
Cu un total di 12 voto, sr. Thijsen a keda eligi como presidente di Parlamento, despues di 12 aña consecutivo cu el a fungi como parlamentario. Den e votacion aki dos voto a keda invalido debi cu a wordo poni dos nomber di parlamentarionan riba e mesun papel di votacion.
E biaha aki e fraccion di MEP tabata full completo cu e incorporacion oficial di e parlamentario Sue-ann Ras kende a huramenta dilanti di gobernador ayera mainta.
Parlamentario Marisol Lopez Tromp a hiba palabra bisando cu presidente di parlamento ta e funcion maximo di nos pais representando Aruba. E veterano politico aki a bisa cu presidente di Staten tin un tarea primordial despues di gobernador; ta presidente di parlamento ta nifica representa nos pais. P’esey e ta spera cu e miembronan di nos parlamento ta duna un berdadero realse na e instituto aki y na e funcion di presidente di parlamento como deber ser na bienestar di Aruba.
Otro parlamentario cu a hiba palabra tabata e lider di e fraccion di MEP, Rocco Tjon a bisa cu parlamento a drenta un epoca caminda nan tur ta bay hiba un politica riba nivel. “Un politica nobo. Mi ta kere no lo tin un miho persona cu señor Thijsen pa guia e proceso aki tambe mirando e experiencia cu e tin”.
Parlamentario Candelaria a bisa cu fraccion di AVP ta uni na e palabranan expresa pa e fraccion di MEP y RED pa hiba un politica di nivel di debatenan cu contenido. Aunke logicamente nan ta keda cu nan diferencia politico cu ta algo bon y sano pero nan ta consciente cu nan tur mester traha hunto pa bienestar di pais di Aruba. Di parti di e unico fraccion di oposicion, parlamentario Candelaria a expresa tur sorto di exito. Aunke nan ta bay hiba un oposicion ‘fuerte y skerpi’, pero a base di respet y di un manera corecto.
Presidente di parlamento
Aunke den cuadro di eleccion ultimo, sr. Thijsen practicamente a despedi pa duna espacio na e generacion nobo di MEP, su destino politico tabata otro. El a pensa: “Laga e hobennan tuma over. Pero aworaki nan a haci un apelacion grandi riba mi pa mi experiencia…”
Esaki a haci cu el a reconsidera su decision anterior a base di e solicitud di su propio coleganan di fraccion. Ta asina cu el a dicidi di compromete su mes cu e trabou nobo aki como presidente di parlamento y duna su contribucion pa cambia e imagen cu pueblo tin di e organo aki.
Presidente nobo di parlamento ta considera su mes un politico cu ta bon cu tur hende. Tambe como un persona cu a percura semper pa tin un bon relacion di trabou independiente di e partido cu bo por ta.
El a bisa cu e debate mester ta a base di diferencia di opinion y respet pa otro. Sr. Thijsen ta kere cu den esaki como presidente di parlamento e por haci un bon trabou.
“Mi ta prepara pe!”, el a declara durante un entrevista cu Bon Dia Aruba. El a agrega cu conhuntamente cu e otro parlamentarionan nan lo por brinda nos comunidad loke ta nan deseo.
Ademas e ta sinti su mes hopi orguyoso di su responsabilidad nobo como presidente di parlamento, ya cu esaki ta un posicion di peso. E ta haya cu pa un politico bira presidente di parlamento, mester tin hopi confiansa den bo persona pa bo por representa nos pueblo y pa bo guia e organo legislativo manera mester ta.
Por lesa un entrevista cu sr. Thijsen kinan.
