Ex minister y actual parlamentario di e fraccion di AVP, Richard Arends a declara cu e proceso di transicion di e gobierno anterior pa e gobierno nobo a bay manera normal y den un ambiente di cordialidad.

El a expresa cu e transicion aki a bay den ‘hopi bon forma’ y te hasta den un forma ‘caluroso’ y cu ‘gradicimento’ pa e manera con el a sosode. El compronde cu mesun cos a bay cu su otro coleganan di e gobernacion anterior. P’esey e ta sorprendi cu awor tin declaracionnan di miembronan di e gabinete Wever-Croes, caminda nan ta keha cu no tin instrumentonan pa traha manera computer, etc..

Segun sr. Arends na momento cu nan a haci entrega di e bestuurskantoor y edificio Cocolishi, tur oficina a keda ekipa cu nan aparatonan y mueblenan di oficina. Encuanto si tur e ekiponan y material di oficina ta gelease of si nan ta propiedad di gobierno, el a laga sa cu e derecho pa tin tur e materialnan aki ta di ‘land Aruba’. Kiermen –segun sr. Arends- e ekiponan aki mester a keda como propiedad di pais Aruba, ya sea den oficina di gobierno of cu nan ta wordo traspasa pa otro departamento cu ta algo cu a yega di sosode tambe.

Transicion
Den su declaracion pa prensa el a duna un panorama general di loke nan a entrega na e gobierno nobo cu a tuma over. Entre nan materialnan cu tin di haber cu ekiponan y oficinanan, pero tambe relatonan durante e periodo cu nan a keda demisionario y te hasta rapportnan di asunto financiero. “Nos tabata sa cu e pustamento di dede ey lo a bin. Nos a percura pa tin tur cos documenta”, el a bisa.

Segun e ex mandatario na su debido momento nan lo percura pa publica esaki. Tambe nan tin videonan y potretnan cu ta ilustra exactamente den ki condicion nan a laga e oficinanan di gobierno. Nan a cuminsa divulga algo riba social media durante e prome dia di trabou di e mandatarionan nobo ‘caminda bo por wak nan cu su lessenaar y cu nan computernan’.

Tambe el a laga sa cu varios ekipo, entre nan computernan pa motibo di siguridad y inventario a wordo deposita na lok den e area di e sala di presentacion den e prome piso di e edificio Cocolishi. Nan a tuma inventario di tur e aparatonan aki cu tabata debidamente numera. P’esey den su declaracion ayera mainta na prensa, sr. Arends a reacciona categoricamente riba tur critica haci pa e miembronan di e gobierno nobo cu ta forma parti di e coalicion aki. Segun e hoben politico e falta di ekipo y di material pa traha cu supuestamente a somenta for di sede di gobierno no a tuma luga.

Como miembro di e gabinete anterior Mike Eman II, el a laga sa cu entre diabierna ultimo y dialuna awor, nan a haci entrega di e carteranan na nan sucesornan na bestuurskantoor. Te hasta su mesun persona a ricibi minister actual di Finansa, Economia y Cultura, Xiomara Maduro, como tambe ministernan Chris Romero y Dangui Oduber, unda nan a traspasa loke nan ta yama “lopendezaak”. E unico cu tabata ausente tabata minister Glenbert Croes.

Mirando tur e criticanan cu a wordo haci riba decisionnan cu e gobierno anterior a tuma durante e periodo cu tabata demisionario, e ex- mandatario a duna un concepto mas amplio riba ‘lopendezaak’. El a bisa cu nan no mester atende necesariamente cu casonan cu tin di haber cu politica y maneho, pero tambe con e departamentonan ta funciona y te hasta retonan nan dilanti.

El a bisa cu e miembronan di e gobierno anterior a haci entrega formal di e bestuurskantoor loke no tabata comparabel con nan a ricibi e sede di gobierno na 2009, caminda un team di boluntarionan a yuda dreche. E aña ey el a cuminsa como consehero den e gabinete Mike Eman I, caminda nan a ricibi e edificio aki den un situacion precario, entre otro sin waya di telefon. Nan mester goberna e tempo haya cu Blackberry, ya tabata e unico modo pa comunica for di bestuurskantoor, el a bisa. “Aworaki 8 aña despues nos a entrega un sede di gobierno na ordo, y no solamente fisicamente, pero tambe financieramente”, el a bisa.

Situacion financiero
Siman pasa durante un di e delaster reunion di conseho di minister di e gabinete anterior, nan a aproba e presupuesto supletorio 2017, caminda –segun sr. Arends- nan a logra un biaha mas mantene e deficit di 0.5 porciento di GDP (kiermen un deficit di 60 miyon florin).

Tambe el a anuncia cu e ley aki di presupuesto supletorio a cana su caminda normal prome cu nan a baha. E concepto di ley aki a bay caba na Raad van Advies (RvA), gabinete di gobernador y el a bin bek na gobierno pa presenta na parlamento prome cu 31 di december awor.

Segun ex minister di Economia, e presupuesto supletorio aki tabatin algun ahuste of loke el a yama ‘budget neutral’, caminda unda tabatin gastonan di mas tabata wordo compensa caminda tabatin gastonan di menos. E ta sigura cu e gobierno saliente a mantene y cumpli cu e ley Laft (Landsverordening Aruba financieel toezicht), supervisa pa e colegio di supervision Caft. Tambe nan a entrega e ultimo kwartaal di e relato di gastonan y entradanan cu ministerio di Finansa ta entrega na parlamento.

E relato aki (e di tres kwartaal) ta confirma cu pa 2017, te aworaki nos ta den un 75 porciento di loke ta e gastonan. Kiermen e ta ‘exactamente segun loke a wordo presupuesta’, el a bisa. E tin pleno confiansa cu den e rapport di Banco Central Aruba (BCA) nan por a logra e meta aki. Pa tal motibo e ta sigura cu nan a entrega un presupuesto supletorio, unda a logra mantene –segun ley di Laft- e deficit te 0.5 porciento.

Na final el a expresa su satisfaccion cu e gobierno nobo ta sigui mantene cierto ministerionan crea durante e ultimo gobernacion manera esunnan di innovacion, ciencia y desaroyo sostenibel.