Te ainda Citgo no por a haci entrega oficial di e compleho di e refineria y terminal di combustibel na Gobierno di Aruba. E problema ta sinta cu Citgo kier bay sin paga loke ta debe na gobierno den belasting y tambe loke e compania aki ta debe na Refineria di Aruba (RdA).
Bon Dia Aruba a puntra Prome Minister, Evelyn Wever-Croes kende tambe ta responsabel di e cartera di asunto di Energia, cual ta e motibonan pa kico Gobierno no por a yega ainda na un areglo riba terminacion di e acuerdo cu Citgo?
Negociacion.
Premier Wever-Croes a splica cu den e negociacion tabatin diferente tema cu tabata andando, pero e no ta na haltura di tur e detayenan. Sinembargo den su funcion como hefe di gobierno di Aruba, e sa cu un tema tin di haci cu e asuntonan relaciona cu pago di impuesto y otro compromiso cu Citgo tin cu cumpli cune, prome cu nan ta bay.
Nan no solamente tin di haci cu pago di impuesto, pero tambe pago di e lease na Refineria di Aruba (RdA) cu ta figura como e doño di e compleho aki. Pero e problema ta cu Citgo a bisa cu nan no por paga. E situacion aki ta tranca e entrega di e yabi di e refineria actualmente.
Den poco palabra e mandatario a expresa e posicion di gobierno rond di e asunto aki: E balans cu gobierno ta pone di un banda ta e deber cu Citgo tin di paga cu e compromisonan cu nan a adkiri cu pais Aruba, ya cu gobierno mester di e placa. Pero di otro banda ta e aspecto di siguridad di e compleho aki. “Den esey nos ta!… Con hopi nos ta warda pa bisa: Te aki nos ta yega,” el a bisa.
E mandatario a declara cu tur cos ta depende awor pa dicidi con hopi nos kier pa Citgo finalmente bay for di Aruba. E dilema ta si gobierno ta keda warda keto bay, te ora cu Citgo ta bin cu tur placa ariba mesa. Of yega na un decision crucial di forsa pa Citgo entrega e compleho pronto.
El a bisa cu logicamente den asunto di debe di impuesto di parti di Citgo, eynan gobierno a wordo involucra. Prome mandatario a agrega cu gobierno ta atendiendo cu e asunto aki di pago di impuesto pa medio di nan expertonan di departamento di Belasting y Aduana.
Den esaki no mester papia di indemnisacion -segun e mandatario- sino e deber di Citgo pa paga loke nan debe. “Eigenlijk mas facil ta si nan ta paga tur cos, y e ora nan por bay trankil,” el a bisa.
Premier Wever-Croes a expresa cu durante e negociacion cu gobierno a sostene cu Citgo, cierto momento como gobierno nan a dicidi cu Citgo no por bay sin antes e compania aki paga loke nan debe. Pero prome nan mester tin un bista cla kico Citgo su debe ta cu pais Aruba.
E no sa kico ta e cifranan, pero e ta kere cu actualmente e situacion ta para riba kico ta loke Citgo ta debe. Pero tambe cuanto di esey Citgo ta paga prome cu nan bay. Y si ta keda algo cu Citgo ainda no ta paga, gobierno mester wak con lo bay atende cu esey tambe.
