E reapertura di Oficina di Turismo na San Nicolas ta practicamente un realidad. Durante un entrevista corto cu Bon Dia Aruba, e mandatario encarga cu Turismo, Dangui Oduber, ta splica cu “esaki ta un otro paso firme pa stimula desaroyo na San Nicolas.”
Minister Dangui Oduber ta bisa na Bon Dia Aruba, cu un parti importante di su maneho como minister ta encera pa crea oportunidadnan nobo pa nos comunidad. Pa e motibo aki, ta enfocando hopi riba San Nicolas, tumando na cuenta cu durante hopi aña el a ser lubida. “Nos ta invertiendo den entre otro renobacion di Imsan, proyecto di Prinses Christina School, Baby Beach, Rodgers Beach y hopi otro mas”, minister Dangui Oduber a bisa.
E mandatario ta di opinion cu ta di sumo importancia pa e parti turistico tambe ta uno atractivo pa San Nicolas, tumando na cuenta cu esaki ta nos pilar economico di mas grandi na Aruba. Minister Dangui Oduber: “San Nicolas tin hopi pa ofrece, e ta rico na cultura y e amabilidad di su hendenan por ser sinti unda cu bo bira. No tin duda cu turistanan lo encanta tur cos cu San Nicolas tin pa ofrece.”
Diahuebs awo lo tin un acto di ceremonia na e Visitor Information Center na San Nicolas pa asina duna inicio oficial na e reapertura na e Oficina di Turismo na San Nicolas.
