Minister di Turismo, Salubridad Publico y Deporte ta confia cu e aña’ki ainda lo cuminsa ehecuta e proyecto di Port City y ta spera cu pueblo duna nan un mandato mas pa finalisa esaki.
Minister Danqui Oduber tabata den conferencia di prensa di gobierno unda a papia riba e tema di aeropuerto y continuacion cu ehecucion di e proyecto Gateway 2030, y tambe a bini dilanti e proyecto Port City. Un proyecto ambicioso cu lo cambia henter e cara di e area unda tabata e waf di Playa y parcialmente Bushiri.
Ta papia aki di un proyecto cu un inversion di 500 miyon dollar for di sector priva. Tur e proceso di preparacion di e proyecto ta cla y e fase cu mester drenta den dje ta esun di Destaho Publico.
E mandatario a bisa cu esaki ta un proyecto lo pusha hopi p’e pa motibo cu e lo no solamente cntribui grandemente na e economia pero tambe ta crea cuponan di trabou, ta un ayudo pa finanza publico y stimula GDP.
Henter e area aki banda di waf di Playa ta uno morto, pasobra no tin nada eynan. Desaroyo di Port City lo embyece henter e area, den un Masterplan di 10 pa 15 aña.
Mirando cu tur preparacion ta cla, Oduber ta calcula cu su ehecucion por cuminsa den e di tres of di cuatro kwartaal di e aña’ki. Inclusive a manda invitacion caba pa e inversionistanan cu kier bini cu proyecto riba e area. e ta algo cu lo contribui na interes general di e pais aki.
