Tur cos ta cla pa e Parada Nacional di Luz

Ayera den oranan di atardi, vocero di e comision organisado di e parada nacional di luz, Sr. Lyonel Dirksz a informa den un conferencia di prensa cu tur cos ta cla pa e celebracion di e parada nacional di luz, cu ta bay tuma luga diasabra awo 26 di februari pa 8or di anochi.

Sr. Dirks a indica cu a reuni cu tur esnan cu lo traha durante e parada, mirando cu un parada manera esun di diasabra ta hiba hopi logistica y hopi personanan envolvi, manera Cuerpo Policial, ImSan, Rode Kruis, DOW, Serlimar entre otro. A tene e reunion pa trece tur e partidonan hunto, caminda durante e reunion a contesta pregunta of dudanan cu por tabatin di ambos banda.

Desde anuncio di e parada aki, a priminti cu lo duna cada grupo di carnaval y cada banda musical un suma di placa pa yuda cubri e gastonan necesario pa e parada aki. Segun informacion circulando den comunidad, e suma aki ainda no a yega den man di e gruponan ni e bandanan. Sr. Dirksz a splica cu nan tuma contacto cu tur e gruponan envolvi cu ta participando diasabra den parada ayera mainta pa informa cu, pa motibonan administrativo, tin un tardansa ariba esaki. Pero a priminti nan cu pa prome cu e parada, prome cu diabierna cada un lo haya e suma cu a priminti na nan.

“Na momento cu a reuni cu nan prome biaha, [a bisa] cu lo yuda nan cu cierto suma pa yuda nan cubri cierto gastonan inicial. Pero e parti administrativo kisas nos no a tene cuenta cu e proceso por tarda un poco. Pero den e caso aki si a priminti nan cu pa prome cu parada nan lo tin e suma manera cu nos a priminti”, el a indica.

El a menciona cu nan a combersa cu e gruponan y di nan banda ya caba nan a cuminsa cu e procesonan necesario pa asina diasabra nan por ta riba caya, a pesar cu e suma priminti no a yega na e ora stipula, cual tabata diamars.

Pa loke ta trata fondonan pa parada, Dirksz a subraya cu prome cu Gobierno di Aruba a anuncia e parada, Departamento di Cultura, Comision Celebracion di Dianan Nacional tabatin fondonan disponibel caba. “Esey no tabata un problema na prome instante. E situacion cu e a presenta ta e tardansa di parti administrativo pa e por yega na e grupo”, el a agrega.

El a indica cu den e parti di logistica, tin un logistica hopi grandi pasobra e parada nacional ta manera un parada di carnaval, mirando cu a pesar cu e tin nomber “Parada Nacional di Luz” nan ta involucrando gruponan di carnaval, bandanan di carnaval. El sigui bisa cu nan sa cu durante dos aña no tabatin actividad di carnaval, of un actividad di e magnitud aki riba caya, y despues di dos aña e ta un reto pa tur esnan cu ta traha pa activa back pa organisa un parada den dos siman di tempo.

Dirksz a splica cu pa e parti ey, e logistica a keda practicamente manera cu ta custumbra. Den caso di parti di DOW, for di 6or di atardi caba nan ta cera caminda. Di parti di Serlimar lo percura pa pone barinan di sushi ariba e ruta y nan lo percura tambe pa ora e parada caba di pasa, nan mantene e luga limpi. Di parti di Cuerpo Policial nan lo percura pa tin mas di 125 polis ariba e ruta y na banda pa por mantene orden publico.

Di parti di ImSan tambe, manera ta custumber nan ta bay tin nan postnan di ambulance staciona na diferente puntonan y di parti di Rode Kruis nan lo ta bay ta den e parada. Segun el a compronde, lo bay tin tres miembro di Rode Kruis pa cada grupo en caso cu algo mester sucede nan lo t’ey pa atende tambe.

Dirksz a remarca cu practicamente no tabatin preocupacion, pero tabatin kisas preguntanan di nan parti, mirando cu ta prome biaha cu Comision Celebracion di Dianan Nacional ta organisando un parada. Manera ta conoci esaki ta tuma luga bao di e capa di SMAC, pero den e caso aki, el a indica, pa nan tambe ta prome biaha organisando esaki. Di parti di Departamento di Cultura nan tabatin hopi pregunta y tabatin hopi pregunta tambe ariba con nan lo bay dirigi un parada asina. “Pero preocupacion no tabatin. Despues di e reunion di awe nos tur ta riba e mesun liña awo”, el a agrega.

El a splica cu cada grupo por participa cu maximo 750 participante, esey ta sin conta miembronan di crew ni e miembronan di banda. El a menciona cu nan ta calcula 850 participante pa grupo incluyendo tambe nan team di seguridad, ya cu esey tambe ta wordo pidi manera custumber. Sacando e som, seis biaha 850, Dirksz ta calcula un cantidad di mas o menos cuater mil pa cinco mil persona riba caya diasabra anochi.

Pa loke ta e preparacion di tur e trailernan y e proceso di keurmento di esakinan, el a señala cu siman pasa ora cu nan a reuni KPA a trece e punto ey pa dilanti. El a indica cu despues di e reunion cu KPA nan a informa tur e lidernan di grupo riba e parti aki di cual a keda den nan man e momento ey pa informa e bandanan musical of esunnan cu ta percura pa e trailernan di bar entre otro pa regla esey. “E no ta cay den nos mas, pero si nan ta informa desde siman pasa caba”, el a enfatisa.

Por ultimo, el a indica cu definitivamente nan ta hopi positivo cu e parada aki por trece hopi alegria despues di un di tempo di momentonan hopi pisa. “Tin varios meta tras di e parada aki. Pa nos por yuda e gruponan y bandanan musical cu cierto fondonan pa nos prepara pa carnaval otro aña. E ta sirbi tambe pa nos prepara pa nos drenta den luna cultural cu ta luna di maart cu ta drentando y mesun momento pa nos por duna nos hendenan un señal cu nos ta drentando back den normalidad y pa nos drenta den un ambiente cu nos ta cuminsa kita e miedo kisas pa tipo di eventonan manera esaki. Nos ta hopi positivo, tur cos ta canando manera cu nos a premira y nos ta cla pa diasabra awo”, el a finalisa.