Festival buki mucha (1).jpg

E di 24 version di Festival di Buki pa Mucha lo keda inaugura riba diabierna 28 di october pa 6or atardi patras di Biblioteca Nacional Aruba (BNA) na  George Madurostraat. E acto aki lo ta combina cu un mercado di buki cu e participacion di varios bookstore.

Directora di BNA, Sra. Astrid Britten a bisa cu entrante otro aña e festival aki lo celebra su aniversario di “plata” den cuadro di nan 25 aña di existencia.  E aña aki FCCA a bira e sponsor principal di e festival aki.  E tema di e festival ta “Opa y Oma Conta mi y inspira mi”. Di banda di FCCA, Sr. Franklin Leest a bisa cu pa nan ta un orguyo di por a bira e patrocinado di e festival aki. Nan ta haya relevante di duna nan aporte na e tipo di evento aki; ya cu nan ta considera e lesamento algo masha importante mes.

E cantica di e festival aki ta “Pa Semper Jong”, y e ta un cantica cu ta wordo uza na Hulanda tambe produci pa Kinderen voor kinderen. Nan a dicidi di traduci na Papiamento pa  Sergio Tjie-A-Loi y canta pa Alana Pitre, Whitney E. Nin Pena, Jazmin Valdez y Ellyah Tjie-A-Loi.

Buki di festival

E aña aki e buki di e festival ta “Superoma in coma” (Super Wela den Coma), caminda cada hende cu ta cumpra un buki cerca e bookstore presente den e mercado di buki  lo ricibi gratis e buki di e festival. E ta un forma pa stipula lesamento ya cu e actividad aki tin como meta principal promocion di lesamento, Sra. Britten a bisa.

“Mi ta keda kere cu mas hopi e persona por domina e arte y habilidad di lesamento, bentaha so e tin den bida”, directora di BNA a bisa.

El a relata cu e autor Hulandes Fred Diks cu ta esun cu a skirbi e buki, lamentablemente no por bini Aruba pa  motibo di un accidente cu el a sufri. Pero Sra. Lelian Semeleer kende ta bibliotecaria di BNA y kende a tuma e tarea di traduci e buki na Papiamento, si lo t’ey. E ilustrado di e buki  ta Sr. Rudyomar Leyner kende no por ta presente pasobra su welo a fayece den exterior.

E clausura di e festival lo tuma luga diabierna 4 di november for di 6or atardi te cu 8or anochi na St. Dominicus College na Playa.