Minister Arthur Dowers a reacciona riba e denuncianan haci den su direccion riba mal uzo of malgastamento di fondo destina pa combati criminalidad. Tambe el a referi na e instalacion di un di tres radar na disponibilidad di cuerpo di Coast Guard y e proyecto di e sistema di ESTA pa esunnan cu ta bin bishita nos isla.

Fondo
Durante su conferencia di prensa di despedida, e mandatario a rechasa e tipo di acusacion aki, y el a laga sa cu e tin tur documento. Tambe el a priminti di entrega na prensa unabes cu e ta combersa cu e otro partidonan envolvi pa asina e informacion aki por yega corectamente na comunidad.

Pa loke ta e fondo di criminalidad mes, el a informa cu nan a uza 1 miyon di e fondo aki y tur ta documenta pa kico el a wordo uza. El a bisa cu mayoria di e placa uza di e fondo aki a bay pa prizon, ya cu KIA tabata den un estado sumamente deplorabel y mester mehora e condicion di e trahadonan di prizon y di e hendenan cu ta cera eynan. Tambe den e proyecto di camara di KPA y algun otro proyectonan.

Tambe sr. Dowers a indica cu nan a laga casi 4 miyon florin den e fondo aki. El a sigura cu nan ta bay keda vigila uzo di e placa aki cu ta disponibel. E ta rechasa e echo cu e partidonan cu ta bay sinta como gobierno ta papiando di deficit den tur caminda, “pero tin 4 miyon florin en todo caso disponibel pa husticia sigui traha cu ne”.

Coast Guard y brandweer
Igualmente durante e balans di su maneho e mandatario a bisa nan a haci evaluacion profundo den e departamento di Coast Guard pa bin cu un di tres radar bou e cuerpo aki. Nan tin tur documento, pero e no a revela na prensa ya cu tin informacion hopi confidencial den dje. Tin na e momento aki segun e minister demisionario- 2 miyon florin disponibel pa inverti den e radar aki pa asina tin un panorama amplio den nan sistema di control pa medio di e instrumento aki. “Esaki a wordo haci den cooperacion cu Coast Guard di departamento di Hulanda. Ya caba nan a haci un prueba pa sa ki tipo di radar mester wordo instala. E ta insisti cu ainda tin placa disponibel den e fondo destina pa criminalidad y e oferta ta cla pa por adkiri e di tres radar aki.

“Mi ta laga esey pa e siguiente gobierno por tuma e decision ey!”, el a bisa. E minister demisionario di husticia a agrega cu tur e materialnan di Coast Guard y e radar cu mester wordo reemplasa pero esaki mester tuma luga aki 3 aña ya cu e procedura aki di reconocimento di e cuerpo aki mester wordo haci internacional. Pero e ta indica cu na e momento aki tin tur cos cla pa adkiri e di 3 radar cu nan tin mester pa realisa nan trabou di control.

Otro cuerpo cu lo wordo reforsa cu mas ekipo ta esun di bombero, segun e mandatario. El a anuncia cu nan a pidi un truck, cual ta na caminda, cu a wordo paga casi un aña pasa y e ta spera cu pa otro luna e truck aki ta bin Aruba pa asina aumenta e siguridad na aeropuerto.

Sistema ESTA
E mandatario saliente di Husticia a informa cu pa loke ta e introduccion estilo Mericano di e sistema di ESTA (Electronic System for Travel Authorization), ta completamente cla. E ta spera cu e siman aki ainda nan por draai den un forma piloto pa asina haci un presentacion pa prensa.

El a bisa cu poco poco e sistema aki lo wordo introduci den un forma guia pa medio di Departamento di Inmigracion como un instrumento pa anticipa ora cu un hende ta bin bishita nos pais pa percura cu nos pais ainda por bira mas safe.