“Tur comerciante conscientemente ta firma contract cu banco sabiendo cu nan no mag di pone un suma minimo ora di swipe,” tabata palabranan di Pierre Rafini, vice presidente di Aruba Banker’s Association (ABA) reaccionando riba pregunta di Bon Dia Aruba.
Durante fin di siman a wordo publica riba nos website Bondia24.com e inkietud cu ta reina den nos comunidad tocante swiping bou di 10 florin y a acerca diferente instancia riba e tema aki. E discusion aki ta uno cu pa hopi tempo ta biba den nos comunidad. Sr. Rafini ta splica cu e servicio di ‘point of sale’ (e machine di swipe) ta wordo maneha pa e compania internacional Maestro. Un di e condicionnan cu Maestro ta stipula den nan contract ta cu no mag pone restriccion riba e montante cu e consumidor ta swipe y ta conta pa carchinan di debito como tambe credito. Pa motibo di e condicion aki, tur banco na Aruba ta hiba e mes un maneho segun e vice presidente di ABA ta splica.
Keho
Manera cu Bon Dia Aruba a raporta riba su website, tin hopi keho cu ta visibel ultimamente riba e tema aki, principalmente via medionan social. A splica sr. Rafini cu hopi persona tin e percepcion cu nada ta wordo haci ora cu un keho ta ser entrega na banco. Segun e ta conta nos, e sa cu tin banco cu nan proceso di keho por ta un poco complica y tin biaha “cosnan” ta keda ‘stuck in the middle’ entre e departamento concerni y management cu mester tuma decision, dunando un tardansa inespera.
No tin autoridad
Den un combersacion cu sr. Luciano Maduro, chef consumentenzaak na Dienst Huur- en Consumentenzaken (DHC), ta splica cu nan departamento tin mas cu 2 aña sin ricibi keho riba e “asunto”. A puntra sr. Maduro kico ta haci den caso cu ricibi un keho y e ta splica cu e unico cos cu por haci ta yuda cu consehonan huridico of skirbi un carta pa e consumidor hiba corte. E director ta sigui splica cu DHC no tin autoridad pa tuma accion y tampoco no tin un ‘comision di consumidor’ pa tuma decision, no obstante cu tin hopi tempo ta boga pa esaki cerca gobierno. “E kehonan hopi biaha no ta bale la pena pa bay un abogado si tuma den consideracion e gastonan mara na esaki. P’esey nos ta yuda facilita esakinan door di entre otro skirbi cartanan legal pa e persona,” sr. Maduro ta bisa.
Reaccion ATIA
Bon Dia Aruba a tuma contacto cu Aruba Trade & Industry Association (ATIA) unda a papia cu e directora nobo Michelle de Groot cu aunke a caba di asumi e responsabilidad hopi recien, e la tuma e tempo pa duna informacion pa banda di ATIA. E directora ta bisa cu cerca nan, ni den pasado ni awor no a bin keho di parti comerciantenan pa cu e tema. Su persona mes, conhuntamente cu otro miembronan di directiva a bay sondea kico ta e posibel motibo pa cual cierto comerciantenan lo ta exigi un minimo di dies florin pa por swipe. “Nos no por a haya niun motibo otro cu kisas nan kier genera mas benta of paso nan kier crea mas cash flow. Mi a papia cu un miembro cu tambe ta forma parti di nos board, representante di un banco y el a splica mi cu un transaccion fee ta un porcentahe cu ta keda igual sin importa e suma.” Sra. de Groot a termina bisando cu nan lo haci un sondeo mas amplio riba e tema y lo discutie cu mas comerciante.
Sancion
E vice presidente di ABA ta enfatisa cu tur banco ta riba e mesun liña pa loke ta servicio di ‘point of sale’ y cu tur negoshi cu nenga di tuma un benta via ‘carchi’ ta kibrando reglanan di e contract pa cual nan lo por perde e mashin di swipe. Actualmente tin un reunion di ABA pendiente pa e luna aki ainda unda lo trata e tema, caminda lo prepara un campaña di conscientisacion pa e pueblo y e comerciantenan. “Niun negoshi no mag di nenga di swipe of forsa bo na un minimo. Lo cuminsa tuma accion pisa riba esnan cu ta haci esaki y lo crea un blacklist pa nan na tur banco. Lo keda na e comerciante si e no kier duna servicio cu su competidonan si ta duna,”sr.Rafini ta bisa. ABA kier sigura tur consumidor cu si nan ta sinti cu nan keho no ta wordo tuma na serio, por tuma contacto cu nan y lo haci tur esfuerso di biaha pa actua.
Locual a resalta den tur entrevista ta e hecho cu ta wak siguridad nacional manera un factor grandi pa kico e consumidor kier tin menos placa ‘cash’ riba dje y ta opta pa swipe unda cu e por. E no ta un secreto cu Aruba no ta pasando den su miho momentonan pa cual tanto e comerciante y consumidor mester ta mas alerta.
Bon Dia Aruba lo sigui e desaroyo aki di cerca, manteniendo nos lectornan bon informa.
