Dia 6 di juni tin eleccion pa Parlamento Europeo na Den Haag. En conexion cu esaki Bon Dia Aruba a combersa cu Representante di Hulanda na Aruba, Sr. Vincent Storimans, ken a elabora ariba e proceso di registracion pa ciudadanonan di nacionalidad Hulandes pa e eleccion aki.

Sr. Storimans a splica cu registracion pa por vota den e eleccion di Parlamento Europeo ta cera dia 25 di april y eleccion ta tuma luga dia 6 di juni. El a sigui splica cu riba 6 di juni un ciudadano no por yega na e oficina di VNO cu su paspoort y vota sin cu el a registra, prome cu 25 di april, pa por haci esaki.

Tur persona di nacionalidad Hulandes cu kier vota den e eleccion di Parlamento Europeo por registra pa haci esaki. E proceso di registracion ta bay via e website https://www.denhaag.nl/nl/verkiezingen/kiezers-buiten-nederland/. Riba e website aki e ciudadanonan mester yena cierto documento y mester un copia di nan paspoort y asina nan ta wordo registra.

Sr. Storimans a sigui splica cu despues cu e persona registra na oficina di VNO nan ta haya e documentonan di voto. Cada ciudadano por pasa busca nan documentonan di voto durante e siman prome cu e eleccion tuma luga na e oficina di VNO y ta desea por vota di biaha tambe, no mester warda te dia 6 di juni pa haci esaki.

Pues tin un siman pa vota y otro posibilidad tambe ta cu e votador, despues di registra, por busca su documentonan di voto riba dia di eleccion mes, esta 6 di juni, y asina vota di biaha.

Sr. Storimans a enfatisa cu tur hende cu nacionalidad Hulandes, Arubiano Hulandes, por vota durante e eleccion di Parlamento Europeo dia 6 di juni.

Pa loke ta e cantidad di ciudadano cu a registra te aworaki pa vota, oficina di VNO a informa cu te aworaki nan a ricibi e documentonan di voto di 596 persona. Despues di 25 di april nan lo tin un cifra mas specifico di cuanto hende mas a registra pa vota ya cu registracion ta keda habri te cu 25 di april.

Sr. Storimans a agrega cu un bes cu un ciudadano registra pa vota, e registracion ta uni permanente y e persona ta haya un invitacion pa e eleccionnan unda nan por participa. Den algun caso, por ehemplo eleccion di Tweede Kamer, tin rekisitonan extra cu e ciudadanonan mester cumpli pa por vota, pero den caso di e eleccion di Parlamento Europeo, e registracion ta permanente y pa e siguiente eleccion dentro di cinco aña no mester registra di nobo y automaticamente ta ricibi un invitacion pa vota.

“Nos ta spera tambe cu hende usa nan derecho democratico pasobra ta trata di asuntonan importante na Europa. Naturalmente ta hopi leu fisicamente, pero tin hopi decisionnan importante cu ta ser tuma pa e paisnan den Reino Hulandes,” el a remarca.

Algun di e asuntonan importante aki ta entre otro asuntonan di migracion, economia, seguridad. “Esakinan ta berdaderamente asuntonan importante unda tin hopi placa envolvi y mi ta spera cu hende ta comprende esaki y ta vota. No ta un obligacion, pero ta un derecho y bo por eherce e derecho ey,” el a agrega.

Sr. Storimans a subraya cu Europa tambe ta importante pa Aruba. Algun ehempelnan di esaki, el a menciona ta cu na e Universidad di Aruba tin e Maria Convent. E edificio aki, el a indica, no tabata wordo usa mas y tabata den un mal estado completo. Aworaki esaki a wordo drecha cu placa Europeo cu un asignacion di alrededor 7 miyon euro pa haci esaki. Pronto e Universidad por habri pa uso normal.

Otro ehemplo cu el a trece pa dilanti ta e biahe di prome minister evelyn Wever-Croes cu tabata na Brussel mas o menos un luna pasa y na unda a firma un acuerdo pa ricibi placa Europeo pa e proyecto di e-governance di Gobierno di Aruba na unda ta facilita tur proceso digitalmente. Pa esaki, el a indica, a asigna mas o menos 14 miyon euro.

“Pues algo menos cu 30 miyon florin. Asina ta cu ta trata di placa serio y proyectonan importante pa Aruba,” el a resalta.

Sr. Storimans a splica cu deadline pa por vota pa eleccion di Parlamento Europeo ta dia 6 di juni 3or di atardi, ora local. Si cualkier persona yega pa entrega nan documento di voto despues di 3or di atardi VNO ta ricibi esaki, pero no por conta nan mas y e documento ta wordo poni un banda.

Pa loke ta e proceso di voto mes, Sr. Storimans a indica cu e eleccionnan Europeo, e partidonan cu tin na Hulanda cu ta representa na Tweede Kamer, nan tambe ta e partidonan cu tin un lista pa Parlamento Europeo. Pa vota e ciudadano ta scoge un partido y un candidato. Esaki por ta e lider di e lista of otro candidato riba e lista y e votador ta indica esaki riba su papel di voto.

Despues cu e persona eherce su derecho di voto, esaki ta wordo registra pa VNO y nan ta traha un proceso verbal riba esaki e dia ey y ta manda esaki pa Den Haag pa e registracion.

Pa loke ta e resultadonan, el a splica cu Hulanda ta e prome pais cu lo haci e eleccionnan riba 6 di juni, y e eleccionnan den su totalidad mester sucede entre 6 y 9 di juni. Pues e otro paisnan Europeo ta haci nan eleccionnan e dianan despues. Despues cu tur e eleccionnan termina, Sr. Storimans a indica, e por tuma algun dia prome cu tur e datosnan wordo conta pa municipio di Den Haag y pa despues publica e resultadonan.

Na Aruba, el a splica, cu VNO ta publica e resultadonan di voto di Aruba, Corsou y Sint Maarten e mesun dia of e siguiente mainta, riba e website di e representacion. Asina tur hende por wak cuanto voto a drenta.