Desde algun tempo pasa desaroyo ta tumando luga na Aruba pa loke ta trata infrastructura di camindanan y careteranan, specialmente rotondenan cu a wordo construi pa mehora e trafico y circulacion di e autonan na e isla aki.
Un rotonde ta un cruce di forma circular cu control di acceso di e transito cu ta drenta den dje, e obhetivo ta pa reduci e velocidad di e autonan.
Tocante esaki, ta importante tanto pa hobennan cu ta cuminsa nan rijles pa haya su rijbewijs como pa adultonan pa compronde cu esaki ta un parti cu mester tuma na cuenta na ora di stuur un auto, mirando cu te ainda tin chauffeurnan cu no sa con pa haci uso di un rotonde na Aruba asina como tambe tin hopi eror cu ta wordo haci.
Ta existi diferente tipo di rotonde na Aruba, pero na tur di nan e chauffeur mester tene na cuenta cu semper mester duna paso na e autonan cu ta den rotonde caba y mester scoge e compartimento cu e ta considera cu ta mas adecua den funcion di salida cu e lo tuma.
Investigando riba internet, Bon Dia Aruba a haya un video di Cuerpo di Polis di Aruba di aña 2019 na unda ta splica cu tur e rotonde tin compartimento pa sortia, esey ta nifica cu prome cu un persona lo yega na rotonde mester wak bon e flechanan cu ta den e compartimento riba caminda, e persona ta kies e compartimento cu ta destina na e direccion cu e persona ta bayendo y ora ta drenta eynan e auto mester keda den dje.
Tur chauffeur mester tene na cuenta cu ora ta subi riba un rotonde y ta scoge un caminda pa sali, semper mester pone e signlight manera ley ta stipula.
Den situacion aki e persona no mag di cambia di direccion na momento cu a subi na un rotonde, e beton cu a wordo poni memey ta pa guia e persona pero riba dje of na banda di dje tin un linea blanco cera, e linea ey ta nifica cu e persona no mag di pasa over e linea cu ni un parti di e vehiculo.
Ora un persona ta scoge un compartimento den e rotonde mester keda den dje, pa motibo cu tin algun rotonde cu tin un curva na unda tin cu scoge un di e tres compartimento.
Na momento cu un persona ta stuur riba un rotonde e mester sa cu tin preferencia, ora ta dicidi di drenta den dje semper tin cu duna paso na e otro autonan cu ta riba dje caba.
Tambe tin algun rotonde cu tin paso di peaton y cu den algun momento un persona por crusa riba e caminda, nan semper tin preferencia.
E reglanan general di trafico ta indica cu e limite di velocidad den zona urbano ta di 30 kilometer pa ora, den zona no urbano of no residencial ta di 60 kilometer y tin otro camindanan como ex-Sasakiweg cu awor ta yama Avenida Nelson Orlando Oduber cu por core te hasta 80 kilometer pa ora.
