(AP) – Tupac Shakur su letranan di e canticanan clasico manera “California Love” y “Dear Mama” skirbi na man, hunto cu varios homenahe na su criansa y difunto mama ta entre e cosnan cu lo forma parti di un exhibicion masivo den un museo.

E estado di Shakur a anuncia riba diamars cu e exhibicion “Tupac Shakur. Wake Me When I’m Free” lo habri dia 21 di januari na Los Angeles. E exhibicion ta describi como un experiencia di cu ta rekeri enfoke completo, y ta un experiencia di museo cu ta provoca pensamentonan cu ta explora e bida y historia cu e difunto rapper a laga atras.

Shakur, ken ta un di e figuranan mas grandi den e genero musical hip-hop a fayece den aña 1996 di heridanan fatal causa pa arma di candela na e edad di 25 aña.

E exhibicion ta premira di dura 6 luna largo na Los Angeles cu speransa di expande pa otro ciudadnan tambe.

“Tin varios pida di papel, papelnan skirbi na man, cual ta varios diferente cos manera letranan di tur su canticanan, y poesia cu fanaticonan conoce, te cu un lista di compras pa celebra un hacimento di aña,” Arron Saxe a expresa, president di Kinfolk Management + Media, ken ta trahando cu Shakur su estado. Saxe a traha cu otro estadonan pa otro artistanan di musica iconico manera Otis Redding y Donny Hathaway.

“E meta di henter e exhibicion aki no solamente ta di mustra e gran esencia di Tupac, sino tambe di demostra con simpel y comun e tabata tambe,” Saxe a comenta. “Tin piesanan di paña increibel. E exhibicion aki ta un mescla di arte contemporaneo y tecnologia tambe. Hopi di e artefactonan nunca a ser mira prome.”

“Afeni tabata e muhe color scur mas master den e planeta,” Jamal Joseph, ken ta e difunto rapper su padrino y consehero special di e estado a expresa den un dclaracion. “E tabata genera enfoke riba su persona y tabata cambia e ambiente unda cu e tabata bay. Tupac su briyo tabata mas cu esun di e solo. El a biba y motiva cu un pasion creativo, revolucionario y sin miedo cu e velocidad di un cometa. Afeni y Pac a desafia, crea y transforma historia.”

E experiencia na museo aki di Shakur su estado ta produci conhuntamente cu Universal Music Group, CAA, Round Room Live y Kinfolk Managemnt + Media.

“Tupac Shakur tabata mi malcolm, e tabata mi Martin, y pa crea un experiencia cu ta honra un homber asina asombroso, no por ser expresa den palabra,” Jeremy Hodges, ken su agencia, PRoject Art Collective ta trahando hunto cu The Rock and Roll Hall of Fame riba e porcion creativo di e exhibicion. “Nos tabata kier a crea un experiencia memorabel cu lo inspira bo persona ta un miho homber di loke bo tabata ta ora bo a drenta, tur mientras cu bo ta keda cu e conocemento cu e tabata un persona cu un spirito revolucionario den dje.”