(Caribisch Netwerk) – Bo por mira nan na tur fiesta y evento grandi, cu nan camara, ekipo di grabacion y drone cla pa traha: Christiaan Zweers, Israel Gil y Flavio Maestroni. E hobennan creativo y bon amigo a converti nan pasion den un negoshi exitoso. Awor aki nan ta trahando hunto bou di e nomber Tuna Trio, un colectivo audiovisual cu un meta cla: crea contenido di calidad cu un proposito.

E tres talento creativo ta amigo pa mas cu dies aña y ta comparti nan amor pa skate, lama, deporte acuatico y arte visual. Cu tempo, nan a desaroya nan habilidad audiovisual na un nivel cu awor nan por gana un bida di dje. Cu nan trabou, nan ta inspira no solamente comunidad local, sino tambe ta pone Boneiro ariba mapa internacionalmente. Prome nan tabata traha mas ariba proyecto individual, pero awor nan ta por contrata hunto.

Den un tempo cortico, Tuna Trio a haya hopi proyecto grandi, incluyendo di TCB y BIA, y nan punto mas halto te awor tabata graba e Regatta.

Caminda pa exito
 E tres homber a cuminsa fotografia y grabacion for di chikito. Como teenager, Flavio tabata usa arte pa expresa su emocion y creatividad solamente pa su mes, te ora hende a cuminsa nota cu e tin talento y a pidi mas y mas pa saca potret. Hopi tempran, Flavio a compronde con muda pa otro isla ta un sacrificio grandi, y esaki a dun’e e ambicion pa traha duro pa un futuro mihor. Pasobra e no tabatin paspoort y su posibilidad pa sigui studia tabata limita, el a laga scol un banda y a dedica su mes completamente na fotografia. Y cu exito.

Christiaan tambe no a caba su scol secundario, pero el a bay MBO na Hulanda. El a scoge medionan di comunicacion, pasobra esey ta laga su creatividad bula. “Mi a haya un sentido pa mi bida, trahando cu loke mi ta stima,” el a bisa. Na cuminsamento e tabata traha mas cu video di kite y skate. “Esey ta loke nos tur tres tin en comun: nos ta haci deporte for di chikito y nos tabata graba y edit e momentonan,” Christiaan ta conta.

Israel, cu a lanta na Venezuela, a scoge mesun caminda cu Christiaan y el a bay Hulanda pa studia administracion di negoshi specialisa pa industria di media. Despues di su estudio, el a sinti cu e no kier keda na Amsterdam. “Mi tin un amor inmenso pa lama, mi kier ta cerca di awa,” el a bisa cu motibo pa bay biba na Boneiro. “Y awor e ta e mihor fotografo y trahador di film bou di awa ariba e isla, of mas tanto den Caribe,” su amigonan a agrega.

Pa Christiaan tambe cosnan a keda bay bon. Ademas di traha na un scol di kite, el a sigui concentra mas ariba media, te ora e balansa a kibra y su creatividad a bira su medio di biba. “Ta mucho trabou, pero ta bale la pena,” el a bisa. Flavio a agrega: “Tin momento cu mi ta traha y diripiente mi ta pensa: ‘Wow, mi ta sinti mes manera mi ta riba vakantie!’”

Trahando Hunto
 Debi na e lazo fuerte entre nan, nan tres tabata yuda otro ariba proyecto hopi biaha. Eventualmente, nan a pensa ariba un nomber y Tuna Trio a nace. “E nomber a surgi random den nos grupo di WhatsApp,” Christiaan a conta, “nos ta creativo y nos ta inventa palabranan regularmente.” Awor, e nomber ta referi tambe na nan amor pa lama y e trabou cu nan ta haci.

Aunke nan tur tin un bista amplio ariba media, nan tin nan mes specialidad: Flavio ta specialisa den fotografia, Israel den cinematografia, y Christiaan ta traha concepto y media den un manera mas general. Asina nan ta complementa otro bon. Awor nan ta prefera pone Tuna Trio na prioridad. “Si un cliente kier solamente potret, nos ta fungi como assistent”, Christiaan ta splica. “Nos semper ta para cla si e bira un proyecto grandi,” Flavio ta agrega. “Nos conexion cu otro ta hopi fuerte, asina nos sa kico nos mester di otro”.

Nan mensahe

Nan a bira lider den un industria ariba e isla y ta sinti nan mes inspira. “Nos ta influencia hendenan pa hasi cos cu tin balor,” nan a bisa. Nan ta realisa cu un parti grandi di nan exito ta bini di e comunidad Boneriano cu ta siña otro y ta sostene otro. “Nos ta acorda normanan y balornan den nos trabou pa tene e mercado honesto y competencia saludable.”

Ultimamente, nan ta kere cu bo mester haci loke bo stima, no solamente sigui placa. “E ta di pasion, no di placa,” nan ta bisa. Flavio ta duna conseho: “Mantene den e flow, surf e manera un ola.” Pa bira bon den algo, bo mester hacie hopi. “Mi a tuma miles di portret di sunset, pero bo mester cuminsa algun caminda,” el a bisa. “Haci cos cu ta fascina bo wowo, pasobra e mesun cos lo fascina wowo di otro tambe.”