E islanan ABC sin kita sin pone ta popular bou di turistanan Hulandes. Esaki ta motibo pa TUI fly sigui inverti den vuelonan pa e teritorio di Caribe. E proximo winter e aerolinea lo bula 14 biaha for di Schiphol pa e islanan ABC, dos biaha pa dia pa Corsou, cinco biaha pa siman pa Boneiro y tres biaha pa siman pa Aruba.
Rick van der Pluijm, hefe di TUI Dutch Caribbean: “Ta tremendo cu nos tin dos vuelo pa dia pa Corsou e winter aki. Hunto cu e vuelonan pa Aruba y Boneiro, esaki ta duna turistanan, pero tambe e hendenan na e islanan ABC, un gran variedad di vuelo di y pa Amsterdam, caminda lo bo por bula tambe pa tur e tres islanan sin stop. Mi ta sigur cu nos ta haci hopi hende contento”.
14 vuelo pa siman
E proximo winter TUI lo bula dos biaha pa dia pa Corsou, lo por bula tur dia sin stop, tanto pa ida y buelta. Lo bula cinco biaha pa siman pa Boneiro e temporada di winter aki, tur dia di siman, cu excepcion di diahuebs y diadomingo. E vuelonan ta plania di tal manera cu pasaheronan por bula tres biaha pa siman sin stop pa Boneiro y dos biaha pa siman sin stop pa Amsterdam. Lo bula Aruba tres biaha pa siman. Riba dialuna, diahuebs y diadomingo y semper den combinacion cu Corsou. Aki tambe por bula sin stop tanto riba e vuelo di ida y buelta.
Crew di cabina amplia
Pa por realisa tur e vuelonan, TUI a recluta 18 crew di cabina local nobo na Corsou. Banda di Hulandes nan tur ta papia Papiamento tambe. Cu e coleganan nobo aki, TUI tin awor un grupo di mas o menos 60 crew di cabina local cu por wordo uza specialmente riba e ruta pa y for di e islanan ABC.
Dreamliner
E vuelonan ta wordo haci cu un Boeing 787 Dreamliner di TUI fly. Den e avion aki por reserva tres sesion diferente: Economy, Comfort y Deluxe. Entretanto mayoria acomodacion pa e temporada di winter ta disponibel pa compra. Y e luna aki e oferta pa zomer 2024 lo ta disponibel. Tambe pasashinan los pa e periodo di winter ta disponibel caba pa compra.
