ORANJESTAD – E siman aki, Aruba Port Authority (APA) ta di celebracion. Entre diahuebs y diabierna awor lo drenta nos waf e tugboat nobo di APA. E tugboat lo bini for di Corsou, unda el a permanece pa varios siman pa realisa algun trabou di adaptacion di acuerdo cu exigencianan di APA. Actualmente, nos por ta orguyoso cu Aruba tin e tugboat mas nobo di nos region.
E proyecto di e tugboat nobo aki no ta uno reciente, sino cu e ta bin andando for di hopi aña pasa. El a wordo concretisa danki na e vision di e director anterior di APA, sr. Jossy Figueroa, kende a considera importante pa ekipa APA y su personal di un tugboat moderno, pa brinda un bon servicio. Finalmente el a wordo concretisa pa balor di alrededor di 6 miyon dollar.
Informacion cu nos a compila for di Corsou ta indica cu e tugboat aki lo carga e nomber di ‘Colorado’. Prome cu el a yega Corsou, el a haci un ruta largo for di Vietnam unda e compania Hulandes Damen a fabrik’e. E ta un tugboat full sofistica tipo ASD 2811 di 28 meter di largura y 11 meter di hanchura. E tin 60 ton di peso y un velocidad maximo di 13kts.
‘Colorado’ lo reemplasa e delaster tugboat di APA, esta ‘Andicuri’ cu a bira obsoleto. For di aña 1983, ‘Andicuri’ tabata den operacion, pero te dos aña pasa ‘Andicuri’ no ta opera mas. Durante e dos añanan aki, APA a huur un tugboat for di Hulanda bou e nomber di ‘Arashi’.
