Diabierna miyonario Donald Trump lo keda instala como presidente nobo di Merca, pero te awor e no a papia tocante ningun plan coherente pa e relacion entre Washington y America Latino. E situacion aki ta yena tur region di America Latino cu incertidumbre. Durante henter su campaña electoral y den discursonan cu el a duna despues di su victoria, Trump a sugeri algun tema so, tocante e relacion cu Cuba y a insisti tambe riba construccion di un muraya na frontera entre Mexico y Merca, pa asina por impedi cu inmigrante por dentra Merca. Trump a critica tur acuerdo di liber comercio cu Merca a firma hunto cu otro paisnan y el a priminti un negociacion nobo, cu obhetivo di haci un revision di esakinan. E situacion aki ta un menasa cu ta afecta Mexico directamente, pasobra e pais aki ta uni hunto cu Canada, den un tratado di liber comercio di America di Norte.
E presidente nobo di Merca no a papia nada tocante algun strategia general o algun doctrina cu por duna un guia na e relacion di Washington cu otro paisnan di e continente Latino. Trump no a adelanta ningun plan cu por permiti algun aliansa o interes cu e por tin pa su periodo di gobierno. Marc Hanson, cu ta un politologo y asesor legislativo, a opina cu e “analisis di un posibel relacion entre Trump y America Latino ta hopi facil, pasobra conclusion ta cu ningun hende tin algun idea tocante e decision of plan cu Trump por crea, anto ningun hende sa kico por spera di Trump.”
Contradiccion
“Trump ta un homber confuso, tin un caracter explosivo y un tiki so di capacidad pa concentracion, pa tal motibo “mi por mira cu e liderazgo di Trump lo disparce gradualmente den region di America Latino, te momento cu e no lo ta existi mas”, Hanson a bisa AFP. Na opinion di Hanson “ e instinto di Trump ta permiti cu e por bira un homber cu por abusa di tur pais cu no por cuida y defende nan mes, of tambe e por abusa di algun lider cu ta confrontando desafio. Te na e momento aki parce cu ningun hende sa e direccion cu Trump lo kier tuma, pa logra e avance di e region ey.”
Mark Weisbrot, integrante di Centro di Investigacion di Economia y Politica (CEPR) a bisa cu “ region di Latino America no mester spera hopi cambio den su relacion cu Washington”.
