Trump ta veto presupuesto di Defensa pa rechaso di revocacion di Seccion

Presidente Mericano, Donald Trump a veto e presupuesto di gasto anual di Defensa ayera, despues cu Congreso a pasa esaki dos siman atras. Trump a menasa di veto e presupuesto si Congreso no usa e legislacion pa revoca Seccion 230 di e Communications Decency Act 1996, un ley cu ta protege plataformanan online di responsabilidad pa contenido cu usuarionan ta post.

E presupuesto di defensa di $740.5 biyon, sinembargo, a pasa cu un mayoria bipartisano suficientemente grandi den Congreso cu ta surpasa e rechaso di Trump pa firm’e. E ley di autorisacion di gasto di defensa ta yuda dicidi e nivel di e tropanan y sistemanan nobo di arma, como tambe otro asunto di defensa nacional.

“E Act ta faya hasta di haci cualkier cambio significativo na Seccion 230 di e Communications Decency Act, a pesar di yamadonan bipartisano pa revoca e provision ey”, Trump a bisa den un declaracion. “Seccion 230 ta facilita e transmision di desinformacion stranhero online.”

El a bisa cu keda cu Seccion 230 ‘lo haci nos inteligencia virtualmente imposibel di conduci sin cu tur hende sa kico nos ta haci na cada stap’.

Seccion 230 ta considera como e ley mas importante protegiendo discurso online. E provision esencialmente ta protege companianan cu ta host contenido crea pa usuarionan for di demandanan tocante postnan riba nan servicio.
E ley ta protege no solamente proveedornan di internet manera AT&T, Comcast y Verizon, sino tambe plataformanan di rednan social manera Facebook y Twitter. Tambe ta provee proteccionnan amplio cu ta permiti plataformanan di rednan social scoge con nan ta restringi contenido y ki tipo di contenido nan ta restringi.

Presidente di Congreso, Nancy Pelosi a referi na e veto como ‘un acto di imprudencia cu ta daña nos tropanan, ta pone nos seguridad den peliger, y ta socava e boluntad di e Congreso bipartisano’. Congreso lo move pa elimina e veto dia 28 di december, Pelosi a bisa.

Sen. Lindsey Graham a bisa cu e no ta bay vota pa elimina e veto ‘a menos cu haci esfuerso pa reduci Seccion 230’.

E bataya di Trump contra companianan di rednan social a empeora durante 2020 mientras Twitter y Facebook a cuminsa pone label di advertencia riba postnan di e presidente cu tabata contene informacion disputa. Trump ta sigui usa rednan social pa declara victoria falso den eleccion presidencial 2020.