(AFP)—Presidente Donald Trump a rechasa den un entrevista transmiti ayera pa descarta e posibilidad cu Merca por drenta un recesion e aña aki.
“Mi no gusta pronostica cos asina,” el a conta un entrevistador di Fox News ora cu nan a pidi un respuesta directo tocante un posible recesion den 2025. “Tin un periodo di transicion, pasobra loke nos ta haci ta hopi grandi—nos ta trece rikesa back na Merca,” el a bisa, agregando cu, “E ta tuma un poco tempo.”
Pero e secretario di comercio di Trump, Howard Lutnick, a duna un respuesta mas definitivo ora cu nan a pidi un opinion ayera tocante e posibilidad di un recesion. “Absolutamente no,” el a bisa den e programa “Meet the Press” di NBC, ora cu nan a pidi si Mericanonan mester ta prepara pa un caida economico.
E menasa di tarifa di Trump contra Canada, Mexico, China y otro paisnan a laga e mercado financiero di Merca den turbulencia y consumidornan no sa kico e aña lo trece. E mercado di balor (stock market) a caba cu su pio siman desde e eleccion di november.
E medidanan di confianza di consumidornan a baha, pasobra clientenan—cu ya tabata sufri di añas di inflacion—ta warda pa e prijsnan mas halto cu e tarifanan por trece. Ademas, e despedido masivo den gobierno cu ta bao direccion pa e consehero multimiyonario di Trump, Elon Musk, ta aumenta mas preocupacion.
Algun indicador ta confuso.
Un index ampliamente vigila di e Federal Reserve di Atlanta ta pronostica un contraccion di 2.4% den crecemento real di Merca su GDP pa e prome kwartaal di aña, loke lo ta e resultado mas malo for di e peak di e pandemia di Covid-19.
Mucho di e incertidumbre ta surgi for di e politica di tarifa fluctuante di Trump—e fechanan di implementacion ta cambia, como tambe e sectornan cu ta ser afecta—mientras cu negoshi- y inversornan ta purba descifra kico ta bin siguientemente.
Kevin Hassett, consehero economico principal di Trump, a ser cuestiona pa ABC si e tarifanan ta solamente temporal of si nan lo por bira permanente. Hassett a bisa cu esaki lo depende di e comportamento di e paisnan cu ta ser afecta. Si nan no ta reacciona positivamente, el a bisa, e resultado por ta un ” ekilibrio nobo ” di tarifanan continuo.
E administracion ta insisti cu mientras cu e economia ta pasa den un “transicion” cu por ta incomodo, e rumbo ta positivo.
Den su mensahe di Estado di e Union diamars, Trump a conta Mericanonan cu nan mester anticipa “un poco di disturbio” ora e tarifanan tuma efecto, pero el a agrega: “Nos ta bon cu esaki. No lo ta hopi.”
Ademas, su secretario di Tesoreria, Scott Bessent, a adverti di un “periodo di desintoxicacion” ora e economia reduci gasto gubernamental.
Mirando e incertidumbre, economistanan ta cauteloso den nan pronosticonan. Economistanan di Goldman Sachs, referiendo na e politicanan di Trump, a aumenta nan probabilidad di un recesion den e proximo 12 luna di 15% pa 20%.
Y Morgan Stanley ta pronostica “un crecemento mas suave e aña aki” cu lo ta mas floho cu nan tabata anticipa anteriormente. Recesionnan generalmente ta ser defini como dos kwartaal consecutivo di crecemento debil of negativo di e GDP.
Merca tabata den recesion brevemente na comienso di 2020 ora cu e pandemia di COVID a plama. Miyones di hende a perde trabou.
Potret di AP.
