Irita pa e critica y repercusion cu a surgi di e retiro di secretario di defensa Jim Mattis, presidente Donald Trump ayera a pusha e hefe di Pentagono pafo dos luna prome cu tabata planifica originalmente, un final menos placentero ainda di un relacion tenso cu a sigui empeora den ultimo lunanan.
Den un serie di tweet Trump ta parce di contesta pregunta pakico el a pone Mattis den su gabinete na prome luga, y a bisa cu e ministro interino di defensa Patrick Shanahan lo tuma su puesto temporalmente dia 1 di januari venidero pa cubri e salida mas tempran di Mattis.
E cambio repentino aki ta kita tur oportunidad di Mattis pa mantene politica di siguridad nacional dentro di cierto limite o suavisa relacionnan afecta cu e aliadonan a traves di e salida planifica na fin di februari. Y e ta refleha e malcontento di Cas Blanco cu e impactante carta di retiro di Mattis, cu a keda publica diahuebs pasa.
Mattis a tuma su retiro den protesta pa decision di Trump pa saca tur tropa Mericano for di Siria, sin consulta cu ne. Funcionarionan di gobierno ta bisa sin embargo cu e reaccion riba su decision pa bay a irita Trump y p’esey el a laga Mattis bay mas tempran.
Lt. Col. Joseph Buccino, un vocero pa Patrick Shanahan, a bisa cu e ex ehecutivo di Boeing lo acepta e nombramento como ministro interino. Ta inusual pa Pentagono tin un ministro interino. Historicamente semper ora un ministro renuncia, e ta keda te ora tin un sucesor nombra; motibo pa Mattis anuncia cu e lo a keda te fin di februari. Trump tabatin otro pensamento.
