Presidente di Merca Donald Trump a papia cu presidente di Colombia, Juan Manuel Santos, tocante su preocupacion pa e crisis cu Venezuela ta bibando, durante un conversacion via telefon entre e dos presidentenan. Nan a papia tambe tocante e proceso di paz na Colombia, Cas Blanco a informa.
Den un conversacion durante fin di siman cu a pasa, Trump a splica su preocupación encuanto e situacion na Venezuela. “Nan a discuti topico manera respet pa tur institución democratico y norma den hemisferio occidental” presidencia di Merca a bisa den un comunicado.
Durante campaña electoral, presidente Trump a papia un tiki tocante Venezuela, y a bisa cu si e no ta resulta ganador di presidencia, anto Corte Supremo di Merca por cambia su mes di un manera diferente, pasobra e corte por bira algo manera situacion na Venezuela. Venezuela ta den un crisis financiero y e grupo di oposicion a denuncia cu awor e pais aki ta den un autoritarismo, despues cu gobierno a cancela referendo revocatorio pa Nicolas Maduro.
Cas Blanco a bisa cu Trump a splica na presidente Santos ”cu ta hopi importante pa continua cu e historia largo di cooperacion di Merca cu Colombia, y a resalta cu Colombia ta un di e principal paisnan cu ta considera un aliado pa Merca den region Latino Mericano. E dos lidernan a discuti e posibilidad pa continua cu apoyo di Merca pa e proceso di paz na Colombia, cu ta busca termina conflicto arma y nan a expresa tambe nan intencion di reuni den futuro.
Santos a skirbi riba su twitter cu el a tene un conversacion “productivo” cu Trump, caminda Trump a duna su apoyo pa proceso di paz na Colombia.
