Presidente Donald Trump a nombra Robert O’Brien, su principal negociado di rehen y un figura estableci den e circulo di politica republicano, como su asesor nobo di Siguridad Nacional.
O’Brien ta e di cuatro persona den dos aña pa asumi e cargo, e ta bira e persona clave di administracion riba materia di siguridad nacional, en medio di creciente tension cu Iran despues di atake fin di siman contra instalacion petrolero di Saudi Arabia y incertidumbre na Afganistan despues di interupcion di combersacion di paz cu Taliban.
E anuncio a bin un siman despues cu a despedi John Bolton pa fuerte desacuerdo den administracion di Iran, Afganistan y otro desafio global. O’Brien, kende a wordo manda pa e caso na Suecia pa monitor e huicio pa atake di rapper Mericano A$AP Rocky, ta un di 5 candidato cu Trump a pone na consideracion.
“Mi ta contento pa anuncia cu mi lo nombra Robert C. O’Brien, actualmente sirbiendo manera Enviado Special Presidencial pa asunto di rehen na Departamento di Estado, como nos Asesor di Siguridad Nacional”, Trump a bisa.
O’Brien a traha den colaboracion cu famia di rehen Mericano y a conseha e trahadonan di e administracion riba asunto relaciona cu rehen. El a yuda sigura e liberacion na februari di ciudadano Mericano, Danny Burch, kende a libera despues di 18 luna.
El a yuda lidera departamento publico-priva pa reforma di husticia na Afganistan durante Bush y Obama su administracion. Na cuminsamento di su carera, e tabata un senior legal official pa siguridad pa comision di ONU, cu tabata dicidi kehonan contra Irak cu a lanta durante e Guera di Golfo. E tabata un mayor di reserva militar Mericano.
O’Brien tin un diploma den ley di University of California, Berkeley y ta co-fundador di un firma di ley na Los Angeles cu ta enfoca riba litigacion y asuntonan di arbitrahe internacional. O’Brien ta autor di ‘While America Slept’, den cual ta adverti cu mundo a bira mas peligroso ‘bou di president Obama su liderasgo den politica exterior’.
