Presidente Donald Trump ta menasando cu veto un legislacion di politica di defensa a menos cu esaki caba cu proteccion pa companianan di internet cu ta protege nan di ta responsabel di material cu nan usuarionan ta post.
Riba Twitter diamars anochi, Trump a enfoca riba Seccion 230 di e Communications Decency Act di 1996, cu ta protege companianan cu por tin triyones di mensahe, di ta demanda pa cualkier persona cu ta sinti ofendi pa algo cu un otro persona a post – sea cu nan keho ta legitimo of no.
Trump a yama Seccion 230 ‘un menasa serio na nos Seguridad Nacional y Integridad di Eleccion’, agregando, ‘pues, si e Seccion 230 hopi peligroso y inhusto no ta termina completamente como parti di e National Defense Autorization Act (NDAA), mi lo ta forsa pa VETO e legislacion’.
Trump ta bringando un guera contra companianan di rednan social pa varios luna, acusando nan di tin prehuicio contra voznan conservador.
Na october el a firma un orden ehecutivo dunando orden pa agencianan di brasa ehecutivo pa pidi agencianan independiente cu ta pone regla, incluyendo Comision Federal di Comunicacion (FCC) y e Comision Federal di Comercio (FTC) pa studia si nan por pone regulacionnan nobo riba e companianan.
Desde cu el a perde e eleccion presidencial, Trump a inunda rednan social cu kehonan no substancia di fraude den votacion. Twitter a tag hopi tweet di Trump cu e aviso ‘E declaracion aki tocante fraude di eleccion ta den disputa’.
E menasa di veto diamars ta otro blokeo potencial pa e paso di e medida di politica di defensa anual, cual ya ta para den Congreso pa un disputa tocante basenan militar cu nomber di oficialnan Confedera. E medida, cu a pasa pa 59 aña consecutivo riba un base bipartisano, ta guia politica di Pentagono y ta cementa decisionnan tocante nivelnan di tropanan, sistemanan nobo di arma y preparacion militar, politica di personal militar, y otro metanan militar.
